Geggjaður lax með rjómalagaðri paprikusósu – tekur bara korter að elda

Deila

- Auglýsing -

Margir elda fiskrétti á mánududögum og er það ýsan sem oftast verður fyrir valinu en gaman er að breyta til og hér er ein alveg dúndurgóð uppskrift sem sló í gegn í tilraunaeldhúsi Gestgjafans, því hún er ekki bara hrikalega bragðgóð heldur líka æðislega einföld og fljótleg. Gott er að bera fram kartöflu- eða blómkálsmús með þessu rétti ásamt fersku salati.

 

Lax með rjómalagaðri paprikusósu
fyrir 4

2 msk. ólífuolía
salt og svartur pipar
500 g laxaflak

Dreypið olíunni yfir laxinn og kryddið vel með salti og pipar. Bakið í ofni við 200°C í um 10-15 mín., eftir þykkt, þar til fiskurinn er fulleldaður eða grillið á meðalheitu grilli.

75 g smjör
2 hvítlauksgeirar, pressaðir
1 krukka grillaðar paprikur
2 handfyllir spínat
1 dl rjómi
salt og svartur pipar

Bræðið smjörið við meðalhita. Setjið hvítlaukinn út í smjörið og lækkið hitann og látið krauma. Hellið vökvanum af paprikunum og saxið þær smátt áður en þeim er bætt út í pottinn ásamt spínatinu. Hellið rjómanum saman við og látið suðuna koma upp. Bragðbætið með salti og pipar og berið fram strax.

Uppskrift/Sólveig Jónsdóttir

- Advertisement -

Athugasemdir