Grilluð pizza með camembert, hvítlaukssveppum, karamellíseruðum lauk og basilíku

Efnisorð

Deila

- Auglýsing -

Að gera pítsudeig er mun auðveldara en margir gera sér grein fyrir og skemmtileg tilbreyting að skella því á grillið til að fá stökka og góða áferð á pítsubotninn.

 

Grillað pítsudeig

Ef á að nota deigið samdægurs notið þá 2 tsk. af þurrgeri en ef á að geyma deigið yfir nótt inni í kæli notið þá 1 tsk. af þurrgeri.

395 ml volgt vatn
2 tsk. þurrger
60 ml ólífuoía
625 g hveiti
2 tsk. salt

Hrærið saman vatn og þurrger í skál. Látið blönduna standa í nokkrar mín., hrærið ólífuolíuna saman við gerblönduna. Hrærið því næst hveitið og saltið saman við með sleikju þar til myndast hefur gróft deig. Setjið deigið í hrærivél með króknum og hnoðið saman á miðlungshraða í 5-7 mín. einnig er hægt að hnoða deiginu saman í höndunum á hreinu vinnuborði í 6-8 mín. Deigið ætti að vera slétt viðkomu. Skerið deigið í 8 jafna hluta.

Smyrjið bökunarplötu með ólífuolíu og leggið deighlutana á bökunarplötuna. Veltið þeim örlítið upp úr olíunni. Plastið bökunarplötuna eða leggið rakt viskastykki yfir deigið. Látið deigið hefast við stofuhita í 1-1 ½ klst. eða þar til deigið hefur tvöfaldast að stærð. Á þessu stigi er hægt að nota deigið strax eða frysta það, einnig er hægt að nota part af deiginu og frysta restina. Ef geyma á deigið í kæli til að nota daginn eftir setjið þá bökunarplötuna strax inn í kæli eftir að hún hefur verið plöstuð og látið deigið hefast yfir nótt inn í kæli. Ef þetta er gert látið þá deigið standa í 1 klst. í stofuhita fyrir notkun. Hægt er að geyma þetta deig í 3 daga í kæli fyrir notkun.

Hitið grill á háum hita í 10-15 mín. áður en byrjað er að grilla pítsurnar. Gott er að hafa hluta af grillinu á lægri hita. Hafið vinnusvæði tilbúið nálægt grillinu með deiginu, sósunni og álegginu sem á að nota. Mótið eitt deig í einu í höndunum með því að toga það til og leggja síðan yfir hendurnar til að teygja það frekar. Passið að rífa ekki gat á deigið, hægt er að móta deigið á vinnuborði með örlitlu hveiti ef það er þægilegra. Leggið deigið á grillið þegar það hefur verið mótað í æskilega stærð. Lokið grillinu og látið bakast í 1-3 mín. eða þar til deigið er byrjað að eldast og myndast hafa grillför á deigið.

Notið töng til að snúa pítsudeiginu við og látið það vera á lægri hita. Smyrjið sósu eða olíu á deigið og setjið álegg á pítsuna samkvæmt uppskriftum. Passið að setja ekki of mikið af álegginu því annars er hætta á að pítsan bakist ekki nægilega mikið. Lokið grillinu og látið pítsuna eldast í 2-3 mín. eða þar til deigið er bakað og osturinn er byrjaður að bráðna. Eldunartíminn á pítsunum getur farið eftir grillinu og hversu lengi það var forhitað þannig að gott er að fylgjast með pítsunni af og til á meðan hún er að bakast.

Notið tangir eða stóran spaða til að færa pítsuna af grillinu yfir á bretti og berið fram. Endurtakið ferlið með restinni af deiginu. Gott getur verið að byrja á næstu pítsu þegar ein er komin á lægri hita ef gera á margar.

Pizza með camembert, steiktum hvítlaukssveppum, karamellíseruðum lauk og basilíku

fyrir 2 pítsur

Karamellíseraður laukur
2 rauðlaukar, afhýddir og skornir í
þunnar sneiðar
1 msk. olía
1 msk. púðursykur

Hitið stóra pönnu á miðlungsháum hita. Setjið laukinn út á pönnuna og eldið í 5-8 mín. eða þar til laukurinn er orðinn glær og eldaður í gegn. Hækkið örlítið undir pönnunni og setjið sykurinn út á laukinn. Eldið saman í 1-3 mín., eða þar til laukurinn er orðin karamellíseraður. Takið af pönnunni og setjið til hliðar.

Álegg á pítsuna
2 msk. olía
1 msk. smjör
300 g sveppir, skornir gróflega niður
1 tsk. sjávarsalt
1 hvítlauksgeiri, afhýddur og saxaður fínt
ólífuolía
1 camembert-ostur, skorinn í sneiðar
2 kúlur ferskur mozzarella ostur, skornar í sneiðar
sneiðar af parmesan-osti
½ hnefafylli fersk basilíkulauf

Hitið stóra pönnu á háum hita með olíu og smjöri. Steikið sveppina þar til þeir verða gylltir á öllum hliðum. Setjið hvítlaukinn út á sveppina seinustu mínútuna á pönnunni og kryddið með salti. Setjið sveppina í skál og látið til hliðar. Eldið pítsudeig samkvæmt uppskrift hér að ofan. Þegar búið er að snúa deiginu við og það er komið á lægri hita penslið þá deigið með ólífuolíu og dreifið úr camembert-osti, mozzarella-osti, steiktum sveppum og karamellíseruðum rauðlauk yfir pizzuna. Lokið grillinu og eldið þar til osturinn er bráðnaður og deigið er bakað. Takið pítsuna af grillinu og rífið sneiðar af parmesan-osti yfir ásamt laufum af ferskri basilíku.

- Auglýsing -
- Auglýsing -

Athugasemdir

Orðrómur

Forsíðuviðtal Mannlífs

Lestu meira