Haustlegur cannelloni-grænmetisréttur sem bragð er af!

Pasta er dásamlegt hráefni og það er hægt að elda á óteljandi máta. Pasta er líka þægilegt í amstri dagsins þegar tíminn er naumur, þá er gott að geta hent pasta í pott og sáldrað góðri tómatsósu eða olíu yfir. En þetta skemmtilega hráefni getur líka verið meiri máltíð sem hentar vel í matarboð eða sem góður laugardagsréttur. Lasagna er einmitt vinsælt í þeim flokki en cannelloni er ekki síður skemmtilegt, en það er hringlaga pasta sem Ítalir fylla með ýmsu góðgæti. Hér býð ég ykkur upp á grænmetisútgáfu af cannelloni sem ég fylli með spínati og osti. Verði ykkur að góðu.

Spínat-cannelloni ostaveisla
fyrir 6

TÓMATSÓSA:
3 msk. ólífuolía
1 rauðlaukur, saxaður
5 hvítlauksgeirar, fínt saxaðir
2 dósir heilir plómutómatar, t.d.
frá Cirio
2 msk. sykur
2 msk. edik
2 tsk. þurrkað óreganó
1 tsk. herbes de Provence
salt og nýmalaður svartur pipar

Hitið olíuna á pönnu eða í potti og steikið laukinn og hvítlaukinn við meðalhita, passið að láta ekki laukinn brenna. Hellið tómötunum í pottinn ásamt restinni af hráefninu og látið malla við vægan hita í u.þ.b. 25-30 mínútur, ágætt er að skera eða mauka tómatana ofan í pottinum. Þegar sósan er tilbúin setjið hana þá í botninn á stóru eldföstu móti.

FYLLING:
400 g spínat
50 g parmesanostur, rifinn
350 g kotasæla
150 g rjómaostur
½ tsk. múskat
1 dl basilíka, fínt söxuð
salt og svartur nýmalaður pipar
250 g cannelloni

AUGLÝSING


Hitið vatn í katlinum og setjið spínatið í stórt sigti. Hellið vatninu yfir spínatið og kreistið vel allan vökva frá þegar það hefur kólnað nóg til að hægt sé að meðhöndla það. Þetta þarf væntanlega að gera í nokkrum skrefum. Skerið spínatið gróft niður og blandið því saman við restina af hráefninu. Fyllið cannelloni með spínatblöndunni, það er best að gera það með sprautupoka. Raðið hverju fylltu cannelloni ofan á sósuna í eldfasta mótinu.

Mynd / Kristinn Magnússon

OFAN Á:
250 g kotasæla
5 msk. sýrður rjómi
80 g rifinn parmesanostur
100 g rifinn mozzarella-ostur
hnefafyllir basilíka, gróft söxuð

Hitið ofninn í 200°C. Hrærið saman í skál kotasælunni og sýrða rjómanum, kryddið með pipar og saltið. Hellið sósunni ofan á cannelloni og sáldrið parmesan- og mozzarella-ostinum yfir allt. Eldið í u.þ.b. 30 mín. eða þar til efsti hlutinn hefur brúnast vel. Ágætt er að taka réttinn úr ofninum og leyfa honum að kólna svolítið áðurn en hann er borinn fram. Berið fram með fersku basilíkunni, fersku salati, rifnum parmesanosti og svörtum pipar.

Ekki missa af þessum

Annað áhugavert efni