2019 | Birtingur útgáfufélag ehf | k.t. 620867-0129 | VSK.nr 11788 | Síðumúla 28 | Allur réttur áskilinn. Notkun á efni miðilsins er óheimil án samþykkis.

Heitir staðir í London

Ljúffengur matur, spennandi markaðir, menning og listir. Þetta eru ástæðurnar fyrir því að London verður alltaf vinsæll ferðamannastaður.

Sexy fish nýtur mikilla vinsælda í London enda er hann í fína hverfinu Mayfair. Mynd/ Sexy Fish

Sexy fish
Sexy fish nýtur mikilla vinsælda í London enda er hann í fína hverfinu Mayfair. Fræga fólkið sækir þennan stað og þeir sem vilja láta til sín taka í samkvæmislífinu. Um er að ræða asískan fiskistað þar sem andrúmsloftið og umhverfið daðrar við franskan brasseríisstíl, staðurinn er mjög flottur og þarna eru öll sætin þægileg. Mjög erfitt getur verið að fá borð og því vissara að panta með góðum fyrirvara og hér þarf að klæða sig upp á! Sexy fish er opinn frá 12.00-2.00 frá mánudögum til laugardaga en eldhúsið lokar 23.30, á sunnudögum lokar staðurinn 23.00. Fyrir þá sem fá ekki borð eða vilja ekki borða á staðnum er tilvalið að fara á barinn og fá sér drykk. Staðsetning: Berkeley Square House, Berkeley Square, Mayfair. Sími fyrir borðapantanir er 020 3764 2000.

Padella
Borough-markaðurinn er áfangastaður fyrir sælkera og þangað leggja margir leið sína, þeir sem gera það um þessar mundir velta því kannski fyrir sér hvers vegna fólk stendur niður að Southwark Street. Jú það er vegna þess að þar er að finna einn heitasta ítalska staðinn í London. Hér er um að ræða lítinn stað á tveimur hæðum þar sem flísarnar eru í neðanjarðarlestastíl, borðin eru úr hvítum marmara og litirnir eru svartur, hvítur og gylltur.

Eldhúsið er opið og hægt að sitja á háum stólum og horfa á kokkana hamast við að búa til pasta og baka súrdeigsbrauð. Þarna er ferskleikinn í fyrirrúmi og matargerðin er einföld og verðið sérlega sanngjarnt. Hér er hægt að mæla með öllum réttum en við mælum með því að fólk fái sér forrétt, aðalrétt og eftirrétt þar sem skammtarnir eru fremur litlir. Þó svo að allir réttirnir séu góðir þá verð ég að mæla sérstaklega með villisveppapastanu! Padella tekur ekki borðapantanir svo hér þarf að standa í röð, staðurinn opnar 12 á hádegi og því gott að mæta svolítið fyrr til að ná inn sem fyrst. Staðsetning: 6 Southwark St, London.

AUGLÝSING


Grannd Café er að finna í German Gymnasium, sem er í miðju King´s Cross-hverfinu. Mynd / Ewan Munro, commons.wikmedia.org

German Gymnasium
Þessi staður er með þeim fallegri! Húsnæðið sem staðurinn er í var upphaflega hannað sem leikfimisalur af Edward Gruning og var eins og nafnið gefur til kynna, leikfimisalur, í raun sá fyrsti sinnar tegundar á Englandi. Húsnæðið var byggt árið 1865 og í því voru fyrstu Ólympíuleikarnir innandyra haldir á Englandi árið 1866. German Gymnasium er í miðju King´s Cross-hverfinu en staðurinn er gríðarlega stór en þar er kaffihús eða Grand Café eins og þeir kjósa að kalla það, fínn matsölustaður er á fyrstu hæðinnni og einnig eru tveir barir og verönd þar sem hægt er að sitja úti.

Matargerðin er þýsk og mið-evrópsk en matseðlarnir eru margir og mismunandi eftir tíma dags, t.d. er morgunverðarmatseðill, brunch-seðill, hádegisseðill, eftirmiðdagsteseðill, kvöldverðarseðill og barseðill. Kaffihúsið er opið frá 8 alla virka daga en mismunandi matseðlar eru í gangi yfir daginn. Réttir eins og snitsel, núðlur, gúllas, hamborgarar og allt þar á milli eru dæmi um rétti á the German Gymansium. Við mælum með því að panta borð á German Gymnasium og hér mætir fólk ekki í íþróttafötum! Staðsetning: 1 King´s Boulevard, sími 020 7287 8000.

Þessi litli og litríki staður býður upp á götumat frá Sri Lanka  … Hér er allt spennandi og nýtt og í raun erfitt að velja … Láttu starfsfólið hjálpa þér.

Hoppers
Þessi litli og litríki staður býður upp á götumat eða „street food“ eins og sagt er á ensku frá Sri Lanka. Hægt er að fá karrírétti, grillaðan mat og það sem þeir eru fægir fyrir namesake hoppers sem er einskonar þunn og stökk pönnukaka með eggi og svo fylgir ýmislegt góðgæti með í litlum skálum. Hér er allt spennandi og nýtt og í raun erfitt að velja, lamb kothu root-rétturinn er vinsæll og svo eru rækjurnar og öndin góð. Láttu starfsfólið hjálpa þér. Hoppers er í Soho en oft er röð fyrir utan þar sem þeir taka ekki pantarnir og staðurinn lítill og afar vinsæll, hér gildir því að mæta snemma og vera þolinmóður. Staðsetning: 49 Frith St.

Höfundur / Hanna Ingibjörg Arnarsdóttir
Aðalmynd / www.pexels.com

Ekki missa af þessum

Annað áhugavert efni