Indverskur kjúklingur á naan-brauði – Frábær og einfaldur réttur á grillið í góðviðrinu

Efnisorð

Deila

- Auglýsing -

Ef ekki er tími til að draga fram grillið í dag þá hvenær? Hér er sniðugur og einfaldur réttur sem hentar vel að henda á grillið með litlum fyrir vara og tilvalið er að borða út á palli, kannski með ullarteppið vafið um sig. Rétturinn er í einskonar götumatarstíl þar sem hægt er að borða hann með höndunum. Með þessum rétti passar vel að drekka góðan bjór eða bara engiferöl. Fyrir þá sem hafa aðeins meiri tíma má líka skella í lítinn fljótlegan eftirrétt eins þessa tiramísú sem tekur bara 15 mínútur að laga og þá er máltíðin fullkomnuð.

 

Indverskur kjúklingur á naan-brauði með jógúrtsósu
fyrir 3-4

Fyrir þá sem hafa tíma til er gott að blanda ½ dl af jógúrt saman við kryddaðan óeldaðan kjúklinginn og láta hann marinerast inn í ísskáp yfir nótt áður en hann er eldaður.

u.þ.b. 700 g (1 pakki) skinnlaus og beinalaus kjúklingalæri
3 tsk. indversk karríblanda frá Krydd- og tehúsinu eða önnur góð karríblanda
1½ tsk. salt
2 rauðlaukar, gróft sneiddur
4 naan-brauð
1 dós hrein jógúrt
1 tsk. kummin
½ gúrka, skorin í litla bita
1 hnefafylli ferskur kóríander

Þerrið kjúklinginn með eldhúspappír og skerið hvert læri í 4-5 bita. Setjið bitana í skál og veltið upp úr karríblöndunni og saltinu og þræðið síðan upp á grillspjót. Setjið til hliðar. Blandið saman hreinni jógúrt, ferskum kóríander og kummin í skál og hrærið vel saman. Stillið grillið að meðalháan hita og látið það hitna vel í u.þ.b. 10 mín. áður en kjúklingaspjótin eru sett á það. Grillið kjúklinginn þar til hann hefur eldast í gegn, gott er að snúa spjótunum reglulega. Grillið lauksneiðarnar á sama tíma þar til þær hafa mýkst. Grillið naan-brauðið þar til það hefur hitnað. Skiptið kjúklingnum og lauknum á milli brauðanna, því næst gúrkubitunum og sáldrið jógúrtsósu og ferskum kóríander yfir.

Uppskrift/Nanna Teitsdóttir
Stílisti/Bergþóra Jónsdóttir
Mynd/Aldís Pálsdóttir

- Auglýsing -
- Auglýsing -

Athugasemdir

Orðrómur

Forsíðuviðtal Mannlífs

Lestu meira