Ljúffengar Madeleine-kökur

Franskar kökur, sérlega bragðgóðar og fínlegar og henta vel með kaffinu.

Frakkar elska kökur! Það gerum við líka!

Frakkar elska kökur! Það gerum við líka! Þessar kökur eru einmitt franskar, þær eru sérlega bragðgóðar og fínlegar og henta vel með kaffinu. Hægt er að kaupa slíkar kökur í matvöruverslunum í Frakklandi en þær fást einnig í sumum bakaríum. Hér á Íslandi fást þær því miður ekki og því verðum við að bregða á það ráð að baka þær sjálf enda bestar heimabakaðar. Sérstök form þarf fyrir kökurnar svo þær verði eins fallegar í laginu og á myndinni. Fyrir þá sem ekki eiga formin þá er hægt að fá þau víða bæði úr áli og úr sílíkoni.

Madeleine-kökur, eða Magðalenur

1 sítróna, börkur notaður

AUGLÝSING


1 ½ vanillustöng

1 msk. sítrónusafi

180 g smjör + 20 g fyrir form

200 g sykur

5 egg

200 g hveiti 20 g fyrir form

1 tsk. lyftiduft

Bræðið smjör í skaftpotti, setjið til hliðar og látið kólna. Hrærið mjög vel saman sykur og egg þannig að blandan verði létt og ljós og lyfti sér nokkuð. Kljúfið vanillustangirnar og skafið fræin innan úr báðum hlutunum með beittum hníf. Rífið sítrónubörkinn af sítrónunni með góðu rifjárni en passið að nota aðeins efsta lagið, ekki hvíta hlutann, hann er of rammur á bragðið. Blandið saman sítrónuberkinum og kornunum innan úr vanillustönginni og látið saman við eggjablönduna ásamt sítrónusafanum. Blandið saman hveiti og lyftidufti í skál og bætið varlega út í blönduna og hrærið vel í þannig að úr verði létt deig án kekkja. Bætið smjörinu saman við deigið og blandið vel, kælið í ísskáp í u.þ.b. 15-20 mínútur. Hitið ofninn í 190°C um leið og deigið fer inn í ísskáp, smyrjið madeleine-form með smjöri, stráið hveiti yfir og hvolfið svo forminu yfir vaskinn og sláið mesta hveitið úr. Fyllið hverja skel í forminu en alls ekki láta fljóta yfir. Bakið í u.þ.b. 20-25 mínútur eða þar til kökurnar eru orðnar gullnar að lit eins og á mynd. Kökurnar geymast vel í 2-3 daga í skáp en mikilvægt er að þær séu í loftþéttum umbúðum.

Myndir / Heiða Helgadóttir

 

 

Ekki missa af þessum

Annað áhugavert efni