2019 | Birtingur útgáfufélag ehf | k.t. 620867-0129 | VSK.nr 11788 | Síðumúla 28 | Allur réttur áskilinn. Notkun á efni miðilsins er óheimil án samþykkis.

Norðurlöndin í öllum efstu sætunum á Ólympíuleikum matreiðslumeistara

Íslenska kokkalandsliðið varð í þriðja sæti í samanlögðum árangri allra á Ólympíuleikum matreiðslumeistara en verðlaunaafhending fór fram í morgun. Liðið vann til gullverðlauna í öllum sínum keppnisgreinum og þegar árangur allra liða hafði verið lagður saman komst Ísland á verðlaunapallinn ásamt Noregi sem lenti í fyrsta sæti og Svíþjóð sem lenti í öðru sæti.

 

„Við höfum sýnt það á þessum Ólympíuleikum að þrátt fyrir það að búa ekki við sama stuðning og keppnislið hinna norðurlandana þá erum við engir eftirbátar þeirra og við erum í fremstu röð á heimsvísu og þar ætlum við að vera,“ segir Björn Bragi Bragason, forseti Klúbbs matreiðslumeistara sem er úti í Stuttgart með liðinu.

„Þetta hefði þó ekki verið hægt án allra þeirra sem leggja okkur lið í að komast hingað út. Ég verð sérstaklega að þakka Íslandsstofu, Ísey skyr og MS sem hafa verið með okkur í þessu verkefni og gert okkur kleift að ná þessum árangri.“

Kokkalandsliðið hefur æft stíft síðustu átta mánuði fyrir keppnina. Hátt í fjögur tonn af búnaði voru send til Þýskalands en liðið þarf að setja upp fullbúið eldhús á keppnisstaðnum. Þá er ótalið hráefnið sem flytja þarf á staðinn, en kokkalandsliðið leggur áherslu á að nota sem mest af hágæða íslensku hráefni í matargerðina.

AUGLÝSING


Sjá einnig: Íslenska kokkalandsliðið í 3. sæti á Ólympíuleikunum

Íslenska kokkalandsliðið tekur á móti verðlaununum
Mynd / Aðsend

Keppnin 25 ára

Ólympíuleikarnir, IKA Culinary Olympics, eru haldnir á fjögurra ára fresti og í ár fagnar keppnin 25 ára afmæli. Þar mætast um 2.000 af færustu kokkum heims sem keppa sín á milli um gull, silfur og bronsverðlaun. Keppnin hófst 14. október og stóð til 19. október. Íslenska kokkalandsliðið keppti í tveimur greinum, annars vegar í „Chef´s table“ og hins vegar í heitum mat, „Hot Kitchen“. Í keppninni um heitu réttina er útbúinn þriggja rétta matseðill með forrétt, aðalrétt og eftirrétt sem eldað er frá grunni á keppnisstað fyrir 110 gesti. Í „Chef´s table“ er framreiddur 7 rétta hátíðarkvöldverður fyrir 10 manna borð, auk tveggja dómara. Kvöldverðurinn samanstendur meðal annars af fiskréttafati, pinnamat, vegan rétt, lambakjöti og desert. Dómarar alls staðar að úr heiminum með tilheyrandi réttindi dæma í keppnunum þar sem meðal annars er tekið mið af bragði, útliti, samsetningu, hráefnisvali og fagmennsku við undirbúning og matargerð.

Landsliðið og fylgdarfólk við verðlauna afhendinguna í hádeginu í dag í Stuttgart
Mynd / Aðsend

Íslenska kokkalandsliðið hefur síðustu ár skipað sér meðal þeirra færustu í matreiðslu og er nú meðal sex bestu kokkalandsliða heims.

Í Kokkalandsliðinu eru: Sigurjón Bragi Bragason, þjálfari Kokkalandsliðsins, Björn Bragi Bragason, forseti Klúbbs matreiðslumeistara, Fanney Dóra Sigurjónsdóttir, varaforseti Klúbbs matreiðslumeistara, Kristinn Gísli Jónsson, Snorri Victor Gylfason, Sindri Guðbrandur Sigurðsson, Snædís Xyza Mae Jónsdóttir, Ísak Darri Þorsteinsson, Jakob Zarioh Sifjarson Baldvinsson, Ísak Aron Ernuson og Chidapha Kruasaeng. Auk þess fara með aðstoðarmenn: Ari Þór Gunnarsson, Aþena Þöll Gunnarsdóttir, Dagur Hrafn Rúnarsson, Guðmundur Halldór Bender, Kristján Örn Hansson, Valur Bergmundsson, Jón Þór Friðgeirsson, Ragnar Marinó Kjartansson og Ívar Kjartansson.

Lestu meira

Annað áhugavert efni

Nýjast á Mannlíf.is

Nýjast á Gestgjafanum