Þennan búðing er ótrúlega auðvelt að gera. Sýran í límónunum veldur því að búðingurinn hleypur og áferðin verður sérstaklega skemmtileg og minnir um margt á eftirréttinn vinsæla Panna cotta. Hér voru notaðar ferskjur með en það er um að gera að prófa fleira, til dæmis bláber, karamelliseruð epli eða perur.
Límónubúðingur með karamelliseruðum ferskjum
fyrir 6-8
5 dl rjómi
140 g sykur
safi úr 4 límónum
Setjið rjóma og sykur í pott og hitið að suðu. Látið sjóða í 3 mínútur, passið að það sjóði hvorki upp úr né brenni við, hrærið allan tímann. Takið af hellunni og bætið límónusafanum við. Hrærið vel og hellið í litlar skálar eða glös. Einnig má bera búðinginn fram í stórri skál. Látið stífna í ísskáp í allavega 3 klukkutíma.
Karamelliseraðar ferskjur
3 ferskjur
2 msk. sykur
2 tsk. balsamedik
Skerið ferskjurnar í sneiðar. Setjið allt saman á pönnu og látið malla við meðalhita í 4-5 mínútur. Setjið ferskjurnar ofan á límónubúðinginn rétt áður en hann er borinn fram.
Umsjón / Katrín Rut Bessadóttir, Kristín Dröfn Einarsdóttir og Sigríður Björk Bragadóttir
Mynd / Bragi Jósefsson
Stílisti / Hanna Ingibjörg Arnarsdóttir