Kjúklingur er þægilegt og gott hráefni sem hentar í marga rétti enda er hann vinsæll meðal Íslendinga. Hér er frábær uppskrift sem innblásinn er af matargerð Austur-Asíu en hérlendis fæst mikið úrval af alls konar kryddum og sósum frá álfunni. Þessi réttur flokkast undir svokallaða „stir-fry“ eða snöggsteikta matargerð.
Kung Pao-kjúklingur
fyrir 4
60 ml hrísgrjónaedik
60 ml sojasósa
1 msk. maíssterkja (maizena)
1,2 kg kjúklingalæri án beins, snyrt og skorin í miðlungsstóra bita
1 msk. olía
7 vorlaukar, skornir í þunnar sneiðar
3 hvítlauksgeirar, saxaðir smátt
2 msk. engifer, fínt saxað
100 g salthnetur
3 msk. balsamedik
8 heilir þurrkaðir chili (fæst í asískum matvörubúðum) eða 1 msk. þurrkaðar chili-flögur
hvít hrísgrjón, soðin
ferskur kóríander
Blandið saman í skál hrísgrjónaediki, sojasósu og maíssterkju þar til allt hefur samlagast vel. Blandið kjúklingnum saman við og látið marinerast í 30 mín. Hitið olíu á stórri pönnu á miðlungsháum hita.
Setjið vorlauk, hvítlauk og engifer á pönnuna. Eldið saman í 3 mín. eða þar til hvítlaukurinn er byrjaður að gyllast. Hrærið í allan tímann. Bætið kjúklingnum á pönnuna og eldið saman þar til kjúklingurinn er eldaður í gegn. Blandið hnetum, balsamediki og chili saman við kjúklinginn og eldið í 2 mín. til viðbótar.
Berið fram með soðnum hrísgrjónum og ferskum kóríander.
