Svakaleg rúlluterta með heslihnetum og núggatfyllingu

Deila

- Auglýsing -

Rúllutertur eru frábærar kökur sem mun auðveldara er að baka en margur heldur. Þær taka yfirleitt stuttan tíma í ofninum og því henta þær vel þegar lítill tími er fyrir höndum. Þessi kaka er hreint sælgæti enda fátt sem toppar núggat og heslihnetur með rjóma. 

Heslihneturúlla með núggatfyllingu
fyrir 10

140 g heslihnetur
2 msk. flórsykur
5 eggjahvítur
5 eggjarauður
120 g sykur

Hitið ofninn í 200°C. Setjið hneturnar í bakka og bakið þær í 5 mín. eða þar til húðið fer að losna af. Takið 40 g frá til að skreyta með, setjið hinar í matvinnsluvél og malið fínt. Þeytið eggjahvítur í hreinni skál þar til þær eru stífar. Bætið 60 g af sykri út í smátt og smátt og þeytið áfram í 3-4 mín., geymið. Þeytið eggjarauður (má nota sömu skál án þess að þvo hana) með 60 g af sykri þar til létt og ljóst. Blandið hnetum í eggjarauðurnar. Bætið hvítum út í, fyrst smávegis og síðan öllum. Útbúið smjörpappír í ofnskúffu og smyrjið hann með olíu eða smjöri, eða notið rúllutertuform. Hellið deiginu í skúffuna og breiðið úr því. Bakið kökuna í 10-12 mín. Látið hana bíða í 5-10 mín. Losið um kökuna við kantana og hvolfið henni á sykurstráðan bökunarpappír. Látið kólna í svolitla stund. Smyrjið kreminu á kökuna (geymið svolítið af því til að smyrja yfir), smyrjið rjómann yfir og rúllið henni upp. Látið restina af kreminu ofan á og stráið söxuðum heslihnetum yfir.

Fylling
100 g súkkulaði
150 g mjúkt núggat
½ dl rjómi
1-2 msk. kakó til að sigta yfir

2 dl rjómi, þeyttur

Bræðið súkkulaði í vatnsbaði með 150 g af núggati og rjóma, kælið lítillega.

Uppskrift/Sigríður Björk Bragadóttir
Stílisti/Ólöf Jakobína Ernudóttir
Mynd/Hákon Davíð Björnsson

- Advertisement -

Athugasemdir