Glæsilegt og veglegt einbýlishús við Góðakur 8 í Garðabæ hefur verið sett á sölu fyrir 420 milljónir króna. Húsið, sem var byggt árið 2011, er 361,8 fermetrar að stærð og stendur á 964 fermetra eignarlóð.

Innbyggður bílskúr er 33,3 fermetrar. Húsið stendur innst í friðsælum botnlanga þar sem opin og gróin svæði eru allt í kring.

Eignin skiptist meðal annars í fimm svefnherbergi, þar af tvær rúmgóðar hjónasvítur, þrjú baðherbergi og gestasalerni. Stórt sérsmíðað eldhús með Miele-heimilistækjum tengist fjölskyldurými, stofu og borðstofu. Þá er sérstakt skrifstofurými í húsinu.

Mikil lofthæð einkennir stofurnar, þar sem einnig er arinn og útsýni yfir gróinn dal og læk. Á efri hæð eru tvennar svalir, annars vegar morgunsvalir og hins vegar síðdegissvalir.

Við húsið er stór og skjólgóð harðviðarverönd með heitum potti og sérstöku borðstofusvæði utandyra. Hluti verandarinnar er yfirbyggður og mikill gróður umlykur svæðið.

Húsið var teiknað af Sigurði Hallgrímssyni, arkitekt hjá Arkþingi, en Rut Káradóttir sá um innanhússhönnun. Mikill metnaður hefur verið lagður í efnisval og sérsmíðaðar innréttingar.

Við eignina eru jafnframt góð bílastæði, rafhleðslustöð og geymsluskúr á lóðinni.