Gunnar Gíslason lögmaður sakar lögregluna á Norðurlandi eystra um að hafa farið offorsi gegn 19 ára skjólstæðingi sínum sem handtekinn var á Akureyri aðfaranótt fimmtudags. Rafbyssu var beitt við handtökuna en lögregla taldi piltinn hættulegan sjálfum sér og öðrum.
Í færslu sem Gunnar hefur birt segir hann skjólstæðing sinn hafa upplifað „mikið einelti“ af hálfu lögreglu frá janúar 2025. Frá þeim tíma hafi 68 mál verið skráð um hann í kerfi lögreglu.
„Afskiptin hafa ýmist verið að ósekju eða þá að allar meðalhófsreglur hafa verið brotnar,“ segir Gunnar.
Hann segir sérsveit hafa farið inn á heimili piltsins og móður hans sex dögum áður en rafbyssunni var beitt.
„Nú er skjólstæðingur minn blessunarlega ekki kominn á sama stað andlega en ofbeldi LSNE hefur tekið mjög á hans andlegu heilsu,“ segir Gunnar.
Að sögn hans var útidyrahurð brotin niður og pilturinn handtekinn þar sem hann lá sofandi í rúmi sínu. Tilefni handtökunnar hafi ekki verið kynnt honum fyrr en síðar. Gunnar telur eðlilegra að boða hefði átt piltinn í skýrslutöku.
Hann lýsir því jafnframt að piltinum hafi liðið mjög illa aðfaranótt fimmtudags. Hann hafi brotnað niður, grátið og lagst á umferðareyju. Þegar lögregla kom á vettvang hafi hann orðið hræddur og reynt að hlaupa á brott.
„Skjólstæðingur minn hætti hlaupum eftir stutta stund, er hann áttaði sig. Lögreglumaður greip þá upp rafbyssu og skaut skjólstæðing minn, án nokkurrar aðvörunar, í búkinn,“ segir Gunnar og tekur fram að pilturinn hafi verið óvopnaður.
Gunnar veltir upp hvort meðalhófs hafi verið gætt og telur mögulegt að lögreglumaðurinn hafi gerst sekur um brot í starfi.
Pilturinn var vistaður í fangaklefa eftir handtökuna. Gunnar segir að beiðni hans um að fá sig sem verjanda hafi í fyrstu verið virt að vettugi. Eftir skýrslutöku var honum sleppt og móðir hans sótti hann.
„Hún ákvað að fara með hann á sjúkrahúsið á Akureyri, til skoðunar. Þar fyrir utan sjúkrahúsið missti hann meðvitund,“ segir Gunnar. Pilturinn var í kjölfarið fluttur á bráðamóttöku og lagður inn.
Gunnar beinir að lokum harðri gagnrýni að Páleyju Borgþórsdóttur, lögreglustjóra á Norðurlandi eystra. Hann segir „ekkert eðlilegt“ við framgöngu lögreglunnar og telur tímabært að lögreglustjórinn axli ábyrgð á því sem hann kallar ómenningu innan embættisins og láti af störfum.
