Íslenskur karlmaður hefur verið dæmdur í 30 daga fangelsi fyrir eignaspjöll í Gullnámunni á Akureyri og vopnalagabrot. Dómur féll í Héraðsdómi Norðurlands eystra 23. september.

Maðurinn var ákærður fyrir að hafa farið inn í Gullnámuna á Akureyri 23. desember 2025 og kastað stólum þrisvar sinnum í spilakassa. Við það urðu skemmdir á skjám spilakassanna.

Hann var jafnframt ákærður fyrir vopnalagabrot vegna atviks á Akureyri 10. apríl síðastliðinn. Lögregla hafði þá afskipti af manninum þar sem hann gekk á gatnamótum Gránufélagsgötu og Hjalteyrargötu með eldhúshníf í vinstri hendi. Hnífurinn var með 150 millimetra löngu blaði.

Maðurinn mætti ekki fyrir dóm þrátt fyrir að hafa verið birt fyrirkall og var málið því dæmt að honum fjarstöddum.

Í dóminum kemur fram að maðurinn eigi nokkurn sakaferil að baki. Hann hefur meðal annars áður hlotið dóma fyrir fíkniefna- og umferðarlagabrot, ofbeldi, nytjastuld, þjófnað, hótanir, líkamsárásir, rán og vopnalagabrot. Árið 2025 var hann meðal annars dæmdur í níu mánaða fangelsi og sviptur ökurétti ævilangt.

Héraðsdómur sakfelldi manninn fyrir bæði eignaspjöllin í Gullnámunni og vopnalagabrotið. Refsing hans var ákveðin 30 daga fangelsi.