Þorgerður Katrín Gunnarsdóttir utanríkisráðherra flytur ávarp Íslands í leiðtogaumræðu áttugasta og fyrsta allsherjarþings Sameinuðu þjóðanna í New York síðdegis í dag, laugardag. Hægt verður að fylgjast með flutningnum í beinni útsendingu á vefsíðu Sameinuðu þjóðanna.
Utanríkisráðherra hefur tekið þátt í fjölmörgum fundum og viðburðum í vikunni í tengslum við ráðherravikuna en jafnan er mikið um að vera þegar þingið er sett ár hvert.
„Á þeim umrótatímum sem við nú lifum er gríðarlega mikilvægt fyrir Ísland að taka virkan þátt í samstarfi þjóða og við gætum hagsmuna okkar Íslendinga með þeim hætti,“ segir Þorgerður Katrín inn á vef utanríkisþjónustunnar. Hún nefnir að hún hafi átt fjöldamörg tvíhliða samtöl í vikunni, bæði á formlegum fundum og á göngum þingsins, en leiðtogavikan bjóði upp á einstakt tækifæri til slíkra skoðanaskipta.
Stór mál á dagskrá: Úkraína og Miðausturlönd
Utanríkisráðherra og Kristrún Frostadóttir forsætisráðherra voru viðstaddar opnun ráðherravikunnar á þriðjudag. Forsætisráðherra sat sérstakan leiðtogafund um tveggja ríkja lausnina milli Ísraels og Palestínu, og flutti Þorgerður Katrín ávarp á fundi ríkjabandalags um sömu málefni auk þess að sækja ráðherrafund stuðningsríkja Palestínuflóttamannaaðstoðarinnar (UNRWA).
Málefni Úkraínu voru sömuleiðis áberandi. Utanríkisráðherra sótti sérstakan viðburð um Krím-skaga þar sem Volodómír Selenskí Úkraínuforseti var aðalræðumaður, fylgdist með umræðum í öryggisráðinu og lýsti yfir stuðningi við Úkraínu á fjölmiðlaviðburði ásamt utanríkismálastjóra ESB, Kaja Kallas, og öðrum evrópskum ráðherrum.
Umhverfismál og mikilvægir fundir við bandaríska ráðamenn
Í vikunni stýrði Þorgerður Katrín fundi kvenleiðtoga og flutti ávörp um hafréttarsáttmála Sameinuðu þjóðanna og hættuna sem stafar af hækkun yfirborðs sjávar. Hún fundaði einnig með utanríkisráðherrum NB8-ríkjanna og Kanada, auk þess sem hún undirritar í dag samkomulag um stuðning Íslands við friðarumleitanir Sameinuðu þjóðanna (DPPA).
Tækifæri til viðræðna við bandaríska ráðamenn í New York voru góð og sótti Kristrún Frostadóttir móttöku á vegum Donalds Trump Bandaríkjaforseta. Þá hitti utanríkisráðherra Marco Rubio, utanríkisráðherra Bandaríkjanna, á fundi norðurslóðaríkja, og átti fundi með Christopher Landau varautanríkisráðherra og Allison M. Hooker aðstoðarutanríkisráðherra.
