Örsmár kettlingur, sem fannst fastur inni í stórri gröfu á vinnusvæði í Ohio í Bandaríkjunum, hefur eignast nýtt heimili hjá starfsmanni verktakafyrirtækisins sem bjargaði honum. Kettlingurinn hefur jafnframt orðið að nokkurs konar lukkudýri fyrirtækisins.
Starfsmenn River Reach Construction voru að undirbúa vinnuvélar fyrir framkvæmdir við stíflu þegar Chase Guello, rekstrarstjóri fyrirtækisins, og bróðir hans Clay heyrðu mjálm berast úr Komatsu-gröfu.
Við nánari athugun kom í ljós að örsmár kettlingur var fastur djúpt inni í snúningshluta vélarinnar. Talið var að hann væri aðeins um tveggja vikna gamall.
Björgunin reyndist nokkuð umfangsmikil. Chase þurfti að skríða undir gröfuna og fjarlægja þar þungar hlífðarplötur, sem vógu um 45 kíló hver, áður en honum tókst að komast að kettlingnum og ná honum út.
Móður kettlingsins var hvergi að finna og gáfu starfsmennirnir honum því mjólk áður en hann var færður í umsjá reyndrar fósturfjölskyldu. Kettlingurinn fékk nafnið Sue, sem er dregið af Komatsu, tegund gröfunnar þar sem hann fannst.
Myndskeið af björguninni vöktu mikla athygli á samfélagsmiðlum og fengu milljónir áhorfa. Komatsu North America frétti einnig af Sue og sendi kettlingnum sérstakt endurskinsvesti og lítinn öryggishjálm með götum fyrir eyrun.
Eftir nokkrar vikur í fóstri fékk Sue síðan varanlegt heimili hjá Jared, vélvirkja hjá River Reach Construction, og tveimur sonum hans.
Sue hefur þó ekki sagt skilið við vinnustaðinn. Hún kemur reglulega á skrifstofu fyrirtækisins á föstudögum og hefur þar með tekið að sér óformlegt hlutverk vinnustaðakattar og lukkudýrs fyrirtækisins.
