Lögreglan á höfuðborgarsvæðinu hafði í ýmsu að snúast í gærkvöldi og í nótt og komu fjölmörg umferðarlagabrot til kasta hennar. Nokkrir ökumenn eru grunaðir um akstur undir áhrifum fíkniefna og lyfja og þurfti í einu tilviki að vista ökumann í fangaklefa.
Lögregla var meðal annars kölluð til vegna einstaklings sem var sagður ógnandi og í annarlegu ástandi með hníf innandyra. Hann var handtekinn og vistaður í fangaklefa vegna rannsóknar málsins. Þá er hann einnig grunaður um vörslu fíkniefna.
Í öðru tilviki barst tilkynning um ökumann sem virtist í annarlegu ástandi og hafði nærri ekið á aðrar bifreiðar. Hann var handtekinn, grunaður um akstur undir áhrifum fíkniefna, lyfja og áfengis. Ökumaðurinn reyndist jafnframt sviptur ökuréttindum og er grunaður um brot gegn vopnalögum. Hann var vistaður í fangaklefa.
Nokkrir aðrir ökumenn voru stöðvaðir vegna gruns um akstur undir áhrifum fíkniefna og lyfja. Sumir þeirra voru jafnframt grunaðir um vörslu fíkniefna eða akstur án gildra ökuréttinda.
Hraðakstur kom einnig við sögu. Einn ökumaður mældist á 123 kílómetra hraða þar sem hámarkshraði er 80 km/klst. Sá hafði aðeins haft ökuréttindi í einn sólarhring. Aðrir mældust á 116 og 114 km/klst. á sama hámarkshraðasvæði.
Þá var ökumaður mældur á 68 km/klst. þar sem hámarkshraði er 30 km/klst. Hann var sviptur ökuréttindum til bráðabirgða.
Lögregla sinnti einnig útköllum vegna óvelkominna einstaklinga á matsölustað, í mathöll og fjölbýlishúsi. Þá var tilkynnt um minniháttar skemmdarverk á skúr og tvívegis þurfti lögregla að hafa afskipti vegna tónlistarhávaða í heimahúsi.
