Umfjöllun Kveiks um það ofbeldi sem drengir sem vistaðir voru í Bakkakoti í æsku, sem sýnd var á RÚV í gær, hefur vakið mikinn óhug meðal Íslendinga.

Í þættinum stigu fram nokkrir af þeim sem voru sendir í fóstur á bóndabæinn Bakkakot á Suðurlandinu og lýstu hryllilegu ofbeldi sem þeir voru beittir þar, andlegu, líkamlegu og kynferðislegu.

Hjónin Jón Ársælsson og Þóra Elísabet Bernódusdóttir voru húsráðendur í Bakkakoti þegar drengirnir dvöldu þar en drengirnir sögðu Jón ekki hafa beitt þá ofbeldinu, heldur Þóra Elísabet. Hún er nú tæplega áttræð og heilsutæp en Jón lést árið 2003.

Fram kemur í þættinum að Þóra hafi oft verið sótölvuð í kringum drengina, sem voru 10-12 ára þegar á dvöl þeirra stóð.

Tveir drengjanna, þeir Svavar Þór Georgsson og Sigvarður Hans Ísleifsson ákváðu í janúar að hringja saman í Þóru, sem liður í því að takast á við fortíðina. Greinilegt er að símtalið reynist þeim báðum mjög erfitt, en þrátt fyrir það ganga þeir ákveðnir til verks og vilja sjá hvernig símtalið fer.

Þegar Þóra svarar símanum spyr Svavar hana hvort eitthvað hafi átt sér stað í Bakkakoti sem hún iðrist í dag. Hún neitar því, en viðurkennir þó að hugsanlega hefði eitthvað getað farið betur. Þegar hann spyr hana sérstaklega um nuddið hafnar hún alfarið að hafa látið drengina nudda sig. Þegar Svavar nefnir líkamlegt ofbeldi svarar hún hins vegar ekki með beinum hætti. Að lokum spyr hann hana almennt um þann tíma sem hann sjálfur dvaldi í Bakkakoti, en þá segist Þóra ekki ætla að fara yfir það og slítur símtalinu skömmu síðar.

Eftir símtalið sitja Svavar og Sigvarður eftir greinilega slegnir og segja ekkert um stund.

„Hún er...já... sko...,“ segir Svavar, greinilega orðlaus.

„Hún er hrædd. Og játar ekki með nuddið,“ segir Sigvarður.

„Það var ekki mikil iðrun í henni,“ segir Svavar.

„Nei og líka bara, um leið og þú nefndir mig vildi hún leggja á,“ segir Sigvarður.

„Þetta er náttúrlega svolítill tími og þetta er náttúrlega „prósess“ líka fyrir hana að rifja upp. Og hún var náttúrlega undir áhrifum,“ segir Svavar.

„En tókstu ekki eftir því, að þegar þú spurðir um áfengið, að hún spurði þig strax á móti; „Varstu ekki að því sjálfur?“ segir Sigvarður við Svavar. „Þannig að hún játaði,“ bætir Sigvarður við.

„Upplifunin er að það er engin iðrun og hún lét það hljóma þannig að þetta væri liðin tíð. Og þetta var bara svona og eins og þetta bara eigi að vera svona. Ég alla vega upplifði enga iðrun. En ég upplifði ótta,“ segir Sigvarður.

Þóra neitaði Kveik um viðtal, að því er fram kemur í þættinum.