Héraðsdómur Reykjavíkur hefur komist að þeirri niðurstöðu að ungur maður, sem slasaðist alvarlega þegar hann féll af dekkjaslöngu sem dregin var á eftir jeppa á Langjökli, eigi rétt á bótum vegna þriggja fjórðu hluta líkamstjóns síns.
Slysið varð 6. nóvember 2021 þegar maðurinn, sem þá var 19 ára, var í jeppaferð á Langjökli ásamt hópi fólks. Uppblásin dekkjaslanga úr dráttarvélardekki hafði verið fest aftan í jeppa og fólk úr hópnum látið draga sig á henni.
Maðurinn settist á slönguna ásamt tveimur gömlum skólafélögum sínum. Jeppanum var ekið á 20 til 25 kílómetra hraða á klukkustund þegar maðurinn féll af slöngunni og slasaðist illa á vinstri fæti. Síðar var varanleg örorka hans vegna slyssins metin 20 prósent.
VÍS hafði áður greitt manninum bætur vegna helmings tjónsins. Byggði tryggingafélagið á því að maðurinn hefði sýnt af sér stórkostlegt gáleysi með því að taka þátt í leiknum. Úrskurðarnefnd í vátryggingamálum hafði áður komist að sömu niðurstöðu.
Maðurinn sætti sig ekki við það og höfðaði mál þar sem hann krafðist fullra bóta.
Héraðsdómur taldi manninn hafa sýnt af sér stórkostlegt gáleysi. Vísað var meðal annars til þess að dekkjaslangan væri létt, gæti skoppað auðveldlega og hefði engin handföng.
Dómurinn taldi þó ekki rétt að skerða bætur hans um helming. Við matið var meðal annars horft til þess að jeppanum hefði verið ekið beint áfram á jafnsléttu og á tiltölulega litlum hraða. Þá taldi dómurinn líklegt að ökumaður jeppans hefði ekið yfir hjólför og ekki sýnt næga aðgát.
Niðurstaðan varð því sú að maðurinn bæri sjálfur fjórðung tjónsins en VÍS og eigandi jeppans bæru óskipta skaðabótaskyldu vegna þriggja fjórðu hluta þess.
