Vitor Farias Oliveira hefur verið dæmdur í fangelsi af Héraðsdómi Reykjaness.

Hann var ákærður fyrir stórfellt fíkniefnalagabrot, með því að hafa, miðvikudaginn 3. september 2025, staðið að innflutningi á samtals 2.717,71 grömmum af kókaíni, með styrkleika 80-82%, ætluðu til söludreifingar hér á landi í ágóðaskyni en fíkniefnin flutti ákærði til Íslands sem farþegi með flugi frá Hamborg, Þýskalandi, til Keflavíkurflugvallar, falin í ferðatöskum.

Vitor játaði brotið en var talið líklegt að hann hafi fengið borgað til að flytja inn eiturlyfin án þess að hafa tekið þátt í skipulagningunni.

Hann var dæmdur í þriggja ára fangelsi og er dómurinn óskilorðsbundinn.