Í hverri viku velur Mannlíf þá einstaklinga sem hafa átt góðu gengi að fagna í vikunni sem er að líða og þá sem átt hafa betri vikur. Að þessu sinni eru það Ólafía Þórunn og Bogi Nils Bogason.
Góð vika
Ólafía Þórunn Kristinsdóttir atvinnukylfingur
Það voru eflaust margir búnir að afskrifa Ólafíu Þórunni sem átti erfitt uppdráttar á sínu öðru tímabili í atvinnumennsku og náði ekki að halda sæti sínu á PGA-mótaröðinni þar sem bestu kylfingar heims spila.
Hún gerði sér hins vegar lítið fyrir í vikunni og sigraði úrtökumót fyrir Opna bandaríska meistaramótið sem er eitt af risamótunum fimm. Þetta er í annað skipti sem Ólafía Þórunn tekur þátt á þessu móti en í fyrra komst hún ekki í gegnum niðurskurðinn.
Vonandi er þetta upphafið að endurkomu íþróttamanns ársins 2017.
Slæm vika
Bogi Nils Bogason, forstjóri Icelandair
Icelandair tilkynnti um 6,7 milljarða króna tap á fyrsta fjórðungi þessa árs sem er álíka upphæð og félagið tapaði allt árið í fyrra. Á þessum tíma fór eiginfjárhlutfall Icelandair úr 32% niður í 23%.
Félagið hefur verið rekið með samfelldu tapi síðan Bogi Nils Bogason settist í forstjórastólinn síðsumars þótt ekki verði horft fram hjá því að aðstæður á flugmarkaði hafa verið gríðarlega erfiðar. Spyrjið bara Skúla Mogensen.
Ofan á erfitt rekstrarumhverfi hrannast vandræði Boeing ofan á Icelandair og jafnvel þótt félaginu takist að koma MAX 7-vélunum í loftið í júní þá er almenningur langt í frá sannfærður um öryggi vélanna.