Bændur fengu góðan liðsauka í vikunni á meðan Vinstri græn hafa verið sökuð um aumingjaskap og tvískinnung þegar kemur að málefnum flóttamanna og því eflaust átt betri dag.
Góð vika, bændur
Tengdasonur bæjarstjóra Reykjanesbæjar hafði ástæðu til að gleðjast en í vikunni kom á daginn að hann hafði afrekað að vera fastráðinn til Brunavarna Suðurnesja þrátt fyrir að vera ekki með löggildingu sem slökkviliðsmaður. Var þar horft til starfsreynslu hans, að sögn slökkviliðsstjórans. Fáir hafa þó átt eins góða viku og bændur. Þrátt fyrir þurrka er spáð góðri kartöfluuppskeru í ár og ekki nóg með það heldur eignaðist FESK, nýstofnað félag svínabænda, eggjabænda og kjúklingabænda, öflugan málsvara þegar Sigmar Vilhjálmsson var ráðinn talsmaður félagsins. Sigmar hefur staðið vörð um þjóðleg gildi, meðal annars barist gegn innleiðingu þriðja orkupakkans og því ljóst að hann er mikill happafengur fyrir félagið.
Slæm vika, Vinstri Græn
Mikil reiði hefur blossað upp á Íslandi vegna mála afgangskra barna sem til stendur að vísa úr landi. Forsætisráðherra og þingmenn Vinstri grænna hafa verið gagnrýnd fyrir getuleysi í málinu. Sökuð um aumingaskap og tvískinnung í ljósi þess hvernig VG hefur í gegnum tíðina hrósað sér „fyrir að standa fyrir mannúð“. Einhver gæti sagt að þarna væri verið að hengja bakara fyrir smið þar sem dómsmálaráðherra úr röðum Sjálfstæðismanna ber ábyrgð á málaflokknum, en VG fær samt verstu útreiðina og því óhætt að segja að flokkurinn hafi átt afleita viku. Facebook-færsla Kolbeins Óttarssonar Proppé þess efnis að hann játaði vanþekkingu á málinu, verandi í útlöndum og fjarri fréttum, þótt það væri ömurlegt, jók ekki beint kátínuna.