„Ég kannski tek fram leðrið“

Hljómsveitin Stjórnin fagnar Eurovision með dansleik á Bryggjunni Brugghúsi annað kvöld. Sveitin mun leika öll vinsælustu laugin sín auk fjölda vinsælla Eurovision-laga. Söngkonan Sigríður Beinteinsdóttir er spennt fyrir kvöldinu.

 

„Ég held að stemningin verði æðisleg á laugardagskvöldið, sérstaklega af því að Hatari komst áfram í lokakeppnina. Það hleypir svo mikilli stemningu í landann. Stjórnin mun alla vega ekki láta sitt eftir liggja og verður í fantaformi,“ segir Sigríður en sveitin er alltaf með nokkur Eurovision-lög á prógramminu og þau fá að sjálfsögðu að hljóma í tilefni af Eurovision.

Sigríður Beinteinsdóttir spáir Hatara í kringum 10. sætið í Eurovision á laugardaginn. Mynd / Rakel Ósk Sigurðardóttir

„Það verður svo að koma í ljós hvort við tökum Hatrið mun sigra, það skýrist á morgun. Ég veit jafnframt ekki hvort Stjórnarmeðlimir séu tilbúnir í að fara í Hatarabúninga eða hvort ég fengi þá í eitthvað slíkt en ég kannski tek fram leðrið,“ bætir hún sposk við.

„Ég spái þeim einhvers staðar í kringum 10. sætið.“

AUGLÝSING


Henni líst mjög vel á atriði Hatara í Eurovision og framgöngu þeirra í keppninni. „Sviðsetningin er æðisleg og atriðið var klárlega flottasta atriðið á þriðjudaginn og þau gjörsamlega negldu þetta. Það gekk allt upp hjá þeim, söngurinn, búningarnir, sviðsetningin, allt samkvæmt áætlun, eins og þau segja sjálf. Ég held þeim muni ganga vel, þau eru að fá alveg rosalega athygli úti sem á örugglega eftir að skila þeim góðu gengi, ég spái þeim einhvers staðar í kringum 10. sætið, allt fyrir ofan það væri auðvitað alveg magnað,“ segir Sigríður.

Stjórnina skipa Sigríður Beinteinsdóttir, Grétar Örvarsson, Eiður Arnarsson, Kristján Grétarsson og Sigfús Óttarsson. Ballið byrjar á Bryggjunni Brugghúsi laugardaginn 18. maí klukkan 23.30 en húsið verður opnað klukkan 22. Miðasala á tix.is.

Ekki missa af þessum

Annað áhugavert efni

Nýjast á Mannlíf.is