FA birtir myndrænt dæmi sem sýnir hlut ríkisins í verði áfengra drykkja

Félag atvinnurekenda hefur nú sett nokkur dæmi upp myndrænt til að útskýra hver hlutur ríkisins í verði áfengra drykkja er.

Undanfarið hefur umræðan um áfengisverð á Íslandi hefur verið áberandi og hefur Félag atvinnurekenda (FA) vakið athygli á tölum hagstofu Evrópusambandsins þar sem fram kemur að áfengisverð er langhæst á Íslandi af 37 Evrópuríkjum.

FA segir verðmun­inn vera vegna „gíf­ur­leg­ra skatta ís­lenska rík­is­ins“ á áfenga drykki.

Nú hefur félagið sett nokkur dæmi upp myndrænt.

„Félag atvinnurekenda hefur að gefnu tilefni reiknað nokkur dæmi um hlut ríkisins í verði áfengra drykkja. Hér er miðað við útsöluverð í vínbúðum Áfengis- og tóbaksverslunar ríkisins,“ segir í grein á vef félagsins. Meðfylgjandi mynd fylgir greininni.

„Hér eru tekin þrjú raunveruleg dæmi úr Vínbúðinni. Áfengisgjald er mishátt eftir því hvort um sterkt vín, léttvín eða bjór er að ræða. Áfengisgjöldin eru föst krónutala á einingu alkóhóls. Skilagjöld eru sömuleiðis krónutölugjöld, en þau eru 19,71 króna á glerflöskur stærri en 500 ml og 18,31 króna á minni glerumbúðir. Á alla áfenga drykki leggst 11% virðisaukaskattur. Álagning ÁTVR er ákveðin með lögum frá Alþingi og er 18% á drykki með 22% eða minni styrkleika en 12% á áfengi með meira en 22% styrkleika,“ segir í skýringatexta. Umfjöllunina má lesa í heild sinni á vef FA.

Til samanburðar sýnir FV einnig hvernig dæmið myndi líta út ef boðuð 2,5% hækkun áfengisgjalds gengur eftir.

Sjá einnig: „Skattlagning á áfengum drykkjum á Íslandi er komin út fyrir öll velsæmismörk“