Hefur hlustað of mikið á Útvarp Sögu

Í hverju tölublaði tiltekur Mannlíf þá aðila sem átt hafa góða viku og slæma viku. Jón Gunnarsson, ekki samgönguráðherra, er sigurvegari vikunnar sem senn er á enda en Páll Óskar hefur átt betri vikur.

Góð vika – Jón Gunnarsson

Jón Gunnarsson hefur verið svo aðsópsmikill í samgöngumálum á kjörtímabilinu að margir líta á hann sem hinn raunverulega samgönguráðherra. Þannig hefur honum tekist að fá ríkisstjórnina til að samþykkja veggjöld, þvert á stefnu allra flokka í ríkisstjórn, þótt hann hafi af aðdáunarverðri auðmýkt leyft samgönguráðherranum, Sigurði Inga Jóhannssyni, að kynna fyrirætlanirnar í fjölmiðlum. Í vikunni fékk hann svo óvænt formennsku í umhverfis- og samgöngunefnd í hendur eftir að Klaustursþingmaðurinn Bergþór Ólason kaus að stíga til hliðar en nefndin hafði verið óstarfhæf svo vikum skipti vegna nærveru hans.

Slæm vika – Páll Óskar

Svo virðist sem Páll Óskar Hjálmtýsson hafi hlustað of mikið á Útvarp Sögu undanfarið. Í það minnsta féll hann í sömu gildru og margir hlustendur stöðvarinnar hafa gert, að heyra eitthvert samhengislaust og fjarstæðukennt rugl og breiða boðskapinn áfram. Páll Óskar raðruglaði í umræðum um Eurovision-keppnina í Ísrael, sakaði gyðinga eins og þeir leggja sig um að stunda þjóðarmorð í Palestínu sagði þá hafa „saumað sig inn í Evrópu á lúmskan hátt á mjög löngum tíma“. Blessunarlega sá poppstjarnan að sér og baðst afsökunar á ummælunum en sagðist standa við gagnrýni sína á framferði Ísraelsríkis.

Ekki missa af þessum

Annað áhugavert efni

Nýjast á Mannlíf.is