Komið að Íslandi að halda Evrópsku kvikmyndaverðlaunin

Verðlaunahátíð Evrópsku kvikmyndaverðlaunanna verður haldin í Hörpu í desember árið 2020.

Hátíðin er haldin annað hvert ár í Berlín en þess á milli til skiptis í öðrum borgum Evrópu. Hátíðin fór fram í Sevilla á Spáni á síðasta ári en hún hefur einnig farið fram í London, París, Róm, Barcelóna, Varsjá, Kaupmannahöfn, Tallin, Möltu, Riga og Wroclaw, svo dæmi séu nefnd.

Hátíðin laðar ávallt til sín fjölmarga erlenda gesti, fagfólk sem tengjast kvikmyndaheiminum og blaðamenn frá ýmsum áttum. Því má búast við að hátíðin verði góð kynning fyrir Ísland og beina athygli að íslenskri kvikmyndagerð og menningu. Ráðgert er að hátt í 1.400 gestir verði viðstaddir verðlaunahátíðina sjálfa og að sýnt verði beint frá henni, hér heima og víða erlendis.

Verðlaunin voru fyrst veitt árið 1988 og er megintilgangur þeirra er að efla og vekja athygli á evrópskri kvikmyndagerð. Til þessa hafa fjórir Íslendingar hlotið þessi eftirsóttu verðlaun. Hilmar Örn Hilmarsson fékk verðlaun fyrir bestu tónlistina í kvikmyndinni Börn náttúrunnar eftir Friðrik Þór Friðriksson og árið 2000 var Björk Guðmundsdóttir hlutskörpust í flokki leikkvenna fyrir hlutverk sitt í mynd Lars von Trier, Dancer in the Dark. Hún hlaut einnig áhorfendaverðlaunin það ár fyrir leik sinn og Ingvar E. Sigurðsson hlaut áhorfendaverðlaun fyrir leik í Englum alheimsins í leikstjórn Friðriks Þórs Friðrikssonar.

Ekki missa af þessum

Annað áhugavert efni

Nýjast á Mannlíf.is