Eva H. Baldursdóttir fjallar um íslensku krónuna í sínum nýjasta pistli sem hún birtir undir yfirskriftinni „skilnaður við íslensku krónuna“.
„Engum dylst að íslenska krónan er óstöðugur gjaldmiðill. Engum sem hefur fylgst náið með íslensku efnahagslífi eða verið þátttakandi í því um nokkurt skeið. Þessi vetur hefur verið enn einn vitnisburðurinn um það. Krónan unnir sér best í höftum virðist vera. Þar á hún sín blómaskeið,“ skrifar hún. Hún bætir við að flestir vita orðið að krónan virkar ekki og að fáir virðist ætla að gera neitt í því.
„Hingað til hafa aðeins tveir flokkar sett þetta mál á oddinn, Samfylkingin hefur talað fyrir nýjum gjaldmiðil með inngöngu í Evrópusambandið. Þá var sérstakur stjórnmálaflokkur, Viðreisn, stofnaður til að styðja við inngöngu Evrópusambandið meðal annars vegna stöðu gjaldmiðilsins. Sú áhersla breytist svo í myntráð síðar. Meira að segja Sjálfstæðisflokkurinn hefur í landsfundarsamþykkt talið að huga þurfi að gjaldmiðlamálum. Mótrök gegn nýrri mynt hafa iðulega verið að við þurfum „ábyrga“ efnahagsstjórn, en ýmislegt bendir til þess að það skipti ekki eins miklu máli enda hefur hún verið talsvert ábyrg frá hruni. Þá er það rétt að í litlu hagkerfi er eðlilegt að það sé einhver óstöðugleiki, en krónan gerir það allt verra.“
Pistil Evu má lesa í heild sinni hérna.