Lilja sigrar vinsældarkeppnina með yfirburðum

Í hverju tölublaði tiltekur Mannlíf þá aðila sem átt hafa góða viku og slæma viku. Að þessu sinni er það mál manna að Lilja Alfreðsdóttir hafi átt góða viku meðan Már Guðmundsson hefur átt betri daga.

Góð vika – Lilja Alfreðsdóttir menntamálaráðherra
Stjórnmál eru að mörgu leyti vinsældakeppni og miðað við nýjustu mælingar sigrar Lilja Alfreðsdóttir þá keppni með nokkrum yfirburðum. Ekki bara eru tveir af hverjum þremur ánægðir með störf Lilju heldur eru líka fæstir óánægðir. Til marks um vinsældir hennar nýtur Lilja 100 prósent stuðnings félaga sinna úr Framsóknarflokknum og kjósendur annarra flokka bera mikið traust til hennar. Þar er reyndar Miðflokkurinn undanskilinn en í ljósi fyrri atburða má efast um hvort Lilja kæri sig um stuðning úr þeirri áttinni. Lilja er í raun komin í sambærilega stöðu og Katrín Jakobsdóttir var í fyrir nokkrum árum þar sem einungis var tímaspursmál hvenær hún yrði forsætisráðherra.

Slæm vika – Már Guðmundsson seðlabankastjóri
Góðkunningjar þessa dálks voru fyrirferðarmiklir í vikunni. Þingmenn Miðflokksins þreytast ekki við að minna almenning á Klaustursmálið með sífellt langsóttari samsæriskenningum og einn af þeim fáu sem ekki sótti þann bar heim kvöldið örlagaríka ákvað að það væri sérdeilis fín hugmynd að stíga í stól Alþingis og segja að Rodrigo Duterte, forseti Filippseyja, sem sakaður hefur verið um gróf mannréttindabrot, sé bara hinn vænsti maður en bara svolítið misskilinn. En enn og aftur verðum við að velja Má Guðmundsson seðlabankastjóra sem í vikunni var kærður til lögreglu af Samherjamönnum. Það er ekki hægt að halda öðru fram en að hagstjórnin undir forystu Más hafi verið farsæl en Samherjamálið virðist ætla að varpa dimmum skugga yfir feril hans.

Ekki missa af þessum

Annað áhugavert efni

Nýjast á Mannlíf.is