„Morgunblaðið er ekki svipur hjá sjón“

Í hverri viku tekur Mannlíf saman eftirminnileg ummæli. Óhætt er að segja að nokkrar sleggjur hafi fallið í vikunni.

„Brotastarfsemi gagnvart erlendu launafólki og ungmennum er alvarleg meinsemd á íslenskum vinnumarkaði sem uppræta verður með öllum tiltækum ráðum.“
Drífa Snædal, forseti ASÍ, lætur þung orð falla í kjölfar birtingar niðurstaða úr nýrri skýrslu sambandsins um brotastarsemi á vinnumarkaði.

„Morgunblaðið er ekki svipur hjá sjón.“
Halldór Blöndal, fyrrverandi ráðherra, gagnrýnir störf Davíðs Oddssonar, ritstjóra Morgunblaðsins, skrif blaðsins um Evrópska efnahagssvæðið og þriðja orkupakkann og veltir því fyrir sér hvar blaðið fór út af sporinu.

„Ég þori að veðja að um helmingur þingmanna myndi frekar stinga höfði í salerni en að andmæla styrkjum til bænda.“
Guðmundur Steingrímsson um íslenskan landbúnað og Alþingi sem hann uppnefnir hagsmunagæslustofu bænda.

„Það að gera grín að matvælaöryggi ætti að vera úrelt hugmyndafræði hjá menntuðum þjóðum.“
Guðfinna Harpa Árnadóttir, sauðfjárbóndi og formaður Landssamtaka sauðfjárbænda, lætur Guðmund heyra það.

AUGLÝSING


„Nú ætlar ríkisstjórn Íslands að taka á móti Mike Pence, ræða kurteislega við hann um viðskiptasamráð og efla með því tengslin við Bandaríkin. Allar slíkar áætlanir eru hrein og klár vanvirðing við samfélag hinsegin fólks á Íslandi. Við munum ekki sitja undir því þegjandi að hann sé boðinn velkominn hingað til lands.“
Þorbjörg Þorvaldsdóttir, formaður Samtakanna ´78, um komu Mike Pence, varaforseta Bandaríkjanna, til landsins en sá hefur leynt og ljóst staðið upp á móti réttindabaráttu hinsegin fólks í Bandaríkjunum.

„Þótt ég sé einlægur stuðningsmaður réttinda samkynhneigðra (og allra annarra einstaklinga) þá er ég hér mjög ósammála þessari ágætis konu. Maður getur ekki kallað eftir opinni umræðu og viljað samtímis þagga niður í þeim sem eru manni mest ósammála.“
Elliði Vignisson, bæjarstjóri í Ölfusi, gagnrýnir Þorbjörgu fyrir að mótmæla komu Pence.

„Sá stóri hluti kjósenda sem telur spillingu í stjórnmálum og fjármálakerfinu stærstu ógnina á sviði þjóðmálanna á það skilið að fleiri flokkar tali hans máli í þingsal.“
Guðmundur Hörður umhverfisfræðingur hefur áhyggjur af innleiðingu þriðja orkupakkans.

„Menn eru með munninn fullan af lýðræðistali svo út af flóir. Svo þegar á hólminn er komið virðist það engu skipta nema það gagnist manni sjálfum hér og nú.“
Jón Kári Jónsson, formaður Félags sjálfstæðismanna í Hlíða- og Holtakerfi, segir óboðlegt að flokksforystan skuli ætla að hunsa vilja flokksmanna í þriðja orkupakkamálinu.

Ekki missa af þessum

Annað áhugavert efni

Nýjast á Mannlíf.is