Óléttar konur í mjólkurbaði er nýjasta æðið í óléttumyndatökum, en vinsælt er að barnshafandi konur, jafnvel með maka, fari í sérstaka myndatöku áður en barnið fæðist.
Á vef Huffington Post er farið ítarlega yfir þetta æði, en ljósmyndarar sem vefmiðillinn leitaði til segja að þeir hafi orðið varir við fyrstu mjólkurbaðsmyndirnar árið 2015.
Ljósmyndarinn Daisy Beatty tók fyrst eftir þessum stíl fyrir einu og hálfu ári og byrjaði umsvifalaust að bjóða upp á þessa lausn fyrir sína viðskiptavini.
„Mjólkurbaðsljósmyndun hefur orðið vinsæl síðustu ár, en sjálf mjólkurböðin eru miklu eldri en það,“ segir Daisy í samtali við Huffington Post.
„Goðsögnin segir að Kleópatra hafi farið í mjólkurböð í Egyptalandi til forna. Þetta er frábær leið til að gefa húðinni raka – það er meira að segja boðið upp á þessi böð í sumum heilsulindum!“ bætir hún við.
Þá segir Daisy einnig að þessi stíll af myndatöku sé einn sá vinsælasti sem hún bjóði uppá, en lítið hefur farið fyrir þessari tísku á Íslandi.
Myndir / Neva Michelle Photography / A Tale Ahead Photography / Daisy Beatty Photograpy