Loksins, loksins! HEIMSKAstþáttur númer 7, stundum kallaður týndi þátturinn, er kominn út eftir alltof langa pásu að margra mati.
Pásan kom til af ýmsum ástæðum, til dæmis Covid, veikindum, tækniveseni og tímaleysi. En nú er HEIMSKast Björgvins og Adams mætt enn á ný. Reyndar er Adam fjarri góðu gamni enn um sinn en Gunnhildur Kjerúlf Birgisdóttir, blaðamaður Mannlífs, leysir hann af með bravúr.
Þátturinn er ansi hrár þar sem tæknimaðurinn Gaui ákvað að klippa ekki framan af honum, þrátt fyrir hótanir frá Björgvini (eins gott að þátturinn er ekki í mynd). Gunnhildur hélt líka að Gaui myndi klippa þáttinn sundur og saman þannig að ýmislegt var látið flakka. Ekkert var hins vegar klippt (sennilega af einskærum kvikindisskap) – enda ef til vill algjör óþarfi.
Í grunninn er þátturinn um heimskulega dauðdaga en allskyns andhetjusögur eru sagðar og fleira bullað.
Í þætti dagsins kemur frostlögur við sögu. Líka frost. Jafnvel nokkurs konar ísbíll.
Sagt er frá svaðilför snjallsímaeiganda í bíó – sem endaði heldur öfugsnúinn og í dálítilli klemmu. Gunnhildur segir líka frá undarlegustu apóteksferð lífs síns – veit annars einhver hvað „Húðaðar“ er?
Góða skemmtun!