2019 | Birtingur útgáfufélag ehf | k.t. 620867-0129 | VSK.nr 11788 | Síðumúla 28 | Allur réttur áskilinn. Notkun á efni miðilsins er óheimil án samþykkis.

    Hvetja fólk til að skoða íslenska fatahönnun næst þegar það kaupir nýja flík

    Fatahönnunarfélag Íslands hleypir af stað vitundarvakningu um íslenska fatahönnun í tilefni af HönnunarMars sem hefst á morgun, miðvikudaginn 23. júní. Markmið verkefnisins #íslenskflík er að varpa ljósi á það framúrskarandi hugvit og þær fjölbreyttu vörur sem hér er að finna.

    Verkerfnið er í formi vefsíðu, innsetningar og vitundarvakningar á samfélagsmiðlum undir myllumerkinu #íslenskflík. Vefsíðan www.islenskflik.is opnar svo á miðvikudaginn, þar getur fólk sótt sér upplýsingar um verkefnið sjálft, fræðsluefni um íslenska fatahönnun og skoðað lista yfir íslenska fatahönnuði og fatamerki.

    Með átakinu #íslenskflík vill Fatahönnunarfélag Íslands hvetja Íslendinga til að staldra við og skoða íslenskan fatnað næst þegar þeir fjárfesta í flík. Mynd / Marsý Hild

    Það eru þær Erla Björk Baldursdóttir og Magnea Einarsdóttir sem halda utan um verkefnið. Þær eru sammála um að margt fólk átti sig almennt ekki á hversu fjölbreytt flóra íslenskrar fatahönnunar er í boði.

    AUGLÝSING


    „Almennt teljum við fólk nokkuð meðvitað um íslenska fatahönnun og bera hana með stolti en vita kannski ekki af breiddinni sem er í boði. Þess vegna ákváðum við að fara í þetta verkefni, til að gera íslenska fatahönnun enn aðgengilegri. Einnig langar okkur að virkja fólk og gefa því tækifæri til að sýna sínar uppáhaldsflíkur frá íslenskum hönnuðum. Þannig viljum við vekja athygli á því framúrskarandi hugviti og þeim fjölbreyttu vörum sem fatahönnunarfyrirtæki á Íslandi bjóða upp á, ásamt því að vekja upp umræðu um þá möguleika sem felast í greininni,“ segir Magnea.

    Úr myndaþætti verkefnisins #íslenskflík. Mynd / Marsý Hild

    Þær segja fatahönnun vera dýrmæta atvinnugrein og að nú sé mikilvægt að hlúa vel að henni.

    „….þess má til dæmis geta að í Danmörku er fatahönnun arðbærust allra skapandi greina.“

    „Nú sem aldrei fyrr er mikilvægt að byggja upp fleiri og fjölbreyttari atvinnugreinar á Íslandi og við teljum starfsemi tengda fatahönnun vera aðlaðandi kost fyrir ungt fólk sem hefur áhuga á hönnun, nýsköpun, viðskiptum og sjálfbærni. Fatahönnun er tiltölulega ný atvinnugrein á Íslandi og ekki eins rótgróin og í mörgum löndum. Það þarf ekki að líta langt til að sjá að efnahagslegt virði hennar getur verið talsvert, þess má til dæmis geta að í Danmörku er fatahönnun arðbærust allra skapandi greina.“

    Hvetja fólk til að velja íslenskt

    Magnea og Erla hvetja fólk til að skoða og nota myllumerkið #íslenskflík á samfélagsmiðlum. Myllumerkið er hugsað sem hvatning fyrir alla þá sem vilja taka þátt í verkefninu. Flíkin getur verið hönnuð, þróuð eða framleidd á Íslandi, eftir því sem við á.

    Þær hvetja fólk einnig til að velja íslenskt þegar það er kostur.

    „Viðskiptavinir geta haft gríðarleg áhrif á eflingu og vöxt innlendra atvinnugreina með því að velja vörur frá íslenskum fyrirtækjum. Með því að velja íslenska fatahönnun styður fólk eflingu vaxandi atvinnugreinar á Íslandi og með verkefninu viljum við hvetja fólk til að staldra við og skoða íslenska fatahönnun næst þegar það fjárfestir í flík.“

    Mynd / Marsý Hild

    Ljósmyndaverk til sýnis í búðargluggum

    Meðfylgjandi er hluti af myndaþætti sem unninn var fyrir átakið. Á myndunum er íslensk hönnun í forgrunni. Ljósmyndarinn Marsý Hild Þórsdóttir tók myndirnar og listræn stjórnun var í höndum Ellenar Loftsdóttur

    Ljósmyndirnar verða sýndar á HönnunarMars í formi innsetningar í gluggum við Skólavörðustíg 20, Laugaveg 30A og Hverfisgötu 94-96.

    Mynd / Marsý Hild

    Mynd / Marsý Hild

    Lestu meira

    Annað áhugavert efni

    Nýjast á Mannlíf.is