Á laugardaginn verður haldið upp á fimm ára afmæli Íshúss Hafnarfjarðar. Þá verða öll rými gamla frystihússins aðgengileg gestum og gangandi.
Íshús Hafnarfjarðar á sér langa sögu en hér áður fyrr var þar starfrækt hraðfrystihús og fiskverkun. Í dag er húsnæðið notað sem vettvangur fyrir samstarf skapandi hönnuða, iðn- og listamanna. Þar koma saman einyrkjar og smærri fyrirtæki og vinna saman í lifandi tenglsum við umhverfi sitt.
Það var sumarið 2014 sem hjónin Ólafur Gunnar Sverrisson tréskipasmiður og Anna María Karlsdóttir mannfræðingur tóku stóran hluta húsnæðisins á leigu undir starfsemina.
Áhuginn leyndi sér ekki og nú fimm árum síðar eru 30 rými um allt húsið þar sem listamenn og hönnuðir sýna og starfa við sínar greinar líkt og keramík, gullsmíði, textíl, vöruhönnun, grafík, ritstörf og fleira.
Næstkomandi laugardag verður haldið upp á fimm ára afmæli Íshússins milli klukkan 13 og 17 – og verða öll rými gamla frystihússins aðgengileg gestum og gangandi.
Íshús Hafnarfjarðar er staðsett á Strandgötu 90.
Sjá einnig: Auðvelt að gleyma sér í Íshúsi Hafnarfjarðar
