Sýning með verkum nemenda við keramikbraut Myndlistaskólans í Reykjavík, sem ber heitið Lyst á breytingum, verður haldin Hafnartorgi í miðbæ Reykjavíkur á HönnunarMars dagana 24. – 28. júní næstkomandi.
Við gerð verkanna skoðuðu kennarar og nemendur hvernig sporna mætti gegn matarsóun og þar með auka virðingu neytenda fyrir hráefnum. Útkoman var einkar áhugaverð og til urðu vörur úr postulíni sem henta til matreiðslu, varðveislu og framreiðslu á matvælum.
Eins og fram kemur á síðu viðburðarins veltu þau fyrir sér spurningum er varða neyslu og það sem framleitt er í hnattrænu samhengi og hvernig hægt sé að þróa nýjar hugmyndir sem ýta undir skilning á stöðu mála.
Skyr, saltfiskur, krydd, kjöt, ís og hunang var á meðal þess sem sjónum var beint að við hönnun og framleiðslu á vörum úr postulíni þar sem útgangspunkturinn er fæða og sjálfbærni.
Sýningin opnar á morgun, miðvikudaginn 24. júní, og stendur yfir í fjóra daga. Hægt verður að fylgjast með vinnuferli við postulínssteypu meðan á sýningunni stendur.
