Bubbi Morthens veltir fyrir sér hvort hann ætti að „þora“ að spila blús aftur í nýrri færslu á Facebook.
„Ætli maður þori að spila blús framar ef maður skildi móðga einhvern,“ skrifaði þessi vinsæli tónlistarmaður og ljóðskáld, Bubbi Morthens og bætti við þremur hláturkörlum. Ekki útskýrði hann frekar hvað hann meinti með þessum orðum sínum en þó nokkrir skrifuðu athugasemdir við færsluna.
Hallgrímur Helgason rithöfundur svaraði Bubba: „Hvítingjablús er samt hræðileg tónlist.“
Þessum orðum Hallgríms svaraði Bubbi um hæl: „Nei en hann hefur annað nafn sem er kántrí, Bólu Hjálmar er einn sá rosalegasti blúsmaður sem sögur fara af hvítir menn hafa margir náð að túlka sársaukann feikna vel.“
Hjálmar Hjálmarsson leikari, sem hefur reyndar leikið Bubba af stakri snilld í nokkrum áramótaskaupum skrifaði sína athugasemd: „Ísbjarnarblús sleppur…held ég…“
Magnús nokkur taldi enga hættu á að einhverjir móðguðust: „Engin hætta á því… blúsinn er alheimseign og upplifun allra… Ekki bara túlkun tregans sem slíks heldur alls tilfinningalitrófsins! Amen!“
Rithöfundurinn Guðmundur Andri Thorsson átti síðasta orðið: „Ég er alltaf að bíða eftir því að þú gerir blúsplötu. Þú með gítarinn. Ég er með stórt blússafn á Spotify. Þar eru bara tveir hvítir blússöngvarar. Þú ert annar þeirra.“ Ekki fylgdi það með hver hinn hvíti blúsarinn er en Bob Dylan kemur sterklega til greina en Bubbi er einmitt mikill aðdáandi þeirrar lifandi goðsagnar.