Jóhönnu Vigdísi Hjaltadóttur fréttamann þekkir hver Íslendingur. Enda birtist hún reglulega á skjáum landsmanna og færir innlendar sem og erlendar fréttir. En nú hefur Jóhanna Vigdís náð heimsathygli og ljósmynd af henni í myndaveri RÚV hefur farið sem eldur í sinu í netheimum. Þó á öllu léttari nótum. Ljósmyndin er svokallað meme*, eða jarm upp á íslensku.
Uppsetning myndarinnar er óheppilega spaugileg. Jóhanna situr við lestur fréttar með bolla sér við hlið. Bak við borð fréttamannsins er skjár sem sýnir fréttamynd af sprengingu. Staðsetning bollans er undir rótum sprengingarinnar. Fljótt á litið virðist sem að reykurinn eigi upptök sín úr bollanum. Yfir myndinni er fyrirsögnin:
„Helvítis f%#$ … Hversu heitt er bruggið hennar!“
*Samkvæmt skilgreiningu á Vísindavefnum segir:
„Í hugum margra er meme einkum brandarar, myndir eða myndbönd sem fljúga um netheima og er deilt áfram en í raun getur meme verið hvað það sem er hægt að herma eftir og þarf ekki endilega að vera fyndið.“