Katy Perry kemur á klakann

Faxaflóahafnir greindu frá því á Facebook síðu sinni í gær að söngkonan Katy Perry sé væntanleg til landsins næsta sumar en í færslunni segir:
„Þær fréttir voru að berast að Katy Perry söngkona og þáttastjórnandi American Idol mun vera guðsmóðir Norwegian Prima skipsins sem mun fá nafngift í ágúst við Skarfabakka. Þetta á eftir að vekja mikla athygli bæði hér innanlands, sem og erlendis“.

Katy sem er með rúmlega 100 milljónir fylgenda á Instagram mun verða svokölluð „guðmóðir“ skemmtiferðaskipsins Norwegian Prima. Skipið mun bjóða upp á Norður-Evrópu ferðir frá Englandi, Hollandi og Reykjavík en auk þess mun skipið sigla um Karíbahafið.
Katy hefur verið ein vinsælasta söngkona heims síðustu ár og hefur hún gefið út hvern smellinn á fætur öðrum sem virðast alltaf slá í gegn.