- Auglýsing -
Rebekka Blöndal og Ásgeir Ásgeirsson gefa út nýja jazz plötu sem ber heitið „Ljóð“.
Jazzsöngkonan Rebekka Blöndal og gítarleikarinn Ásgeir Ásgeirsson hafa undanfarin ár stillt saman strengi sína og er afraksturinn af því samstarfi nú að líta dagsins ljós í formi hljómplötu sem ber titilinn „Ljóð“. Ljóð er átta laga plata sem inniheldur mest megnis frumsamið efni, íslenskan sunginn jazz.
Lagið „Lítið Ljóð“ kom út í júní sl. og hefur notið mikilla vinsælda á Rás 2, og lenti t.d. í 9 sæti vinsældarlistans. Lagið With You hefur einnig vakið mikla athygli á streymisveitum, en lagið kom út árið 2020 og var það upphaf vinnslu þessarar plötu mætti segja. Að sögn listamannanna var markmiðið að semja nokkur jazzlög í gullaldarstíl. Lögin teygja samt sem áður anga sína í allskyns stíla svo sem latin og popp.
Rebekka var tilnefnd til íslensku tónlistarverðlaunanna 2022 sem flytjandi í flokki jazz og blús. Hún er ein fremsta jazzsöngkona landsins og er þetta hennar fyrsta sólóplata. Það var því blásið til útgáfutónleika á Jazzhátíð Reykjavíkur í gær í Hörpu, þar sem platan var frumflutt í heild sinni ásamt fríðu föruneyti.
Platan kemur út hjá Smekkleysu.
