Illugi Jökulsson segir unga fólkið enn lesa Íslendingasögurnar.

Í gær birti Illugi Jökulsson fjölmiðlamaður, Facebook-færslu sem sló heldur betur í gegn en hátt í fjögur hundruð manns hefur líkað við hana þegar þetta er skrifað. Í færslunni segir hann frá því að hann hafi spurt afgreiðslukonu í Pennanum hvort fólk væri að kaupa íslenskan skáldskap á þessum tíma árs. Afgreiðslukonan sagði svo vera og bætti við dæmi um unga stúlku sem gerði sér lítið fyrir og keypti sér fimm Íslendingasögur. Hér fyrir neðan má lesa örsögu Illuga:

„Ég spurði Jórunni í bókabúð Pennans í Austurstræti hvort það væri eitthvað um það á þessum árstíma að fólk rækist inn að kaupa íslenskan skáldskap. Jájá sagði hún, það er alltaf eitthvað um það. Og svo sagði hún mér að fyrr um daginn hefði komið ung stúlka, svona 18-20 ára, og keypt Njálssögu, Egilssögu, Grettissögu, Laxdælu og einhverja fimmtu Íslendingasögu sem ég man ekki hver var. Og stúlkan var bersýnilega að kaupa þessar bækur handa sjálfri sér, ekki til gjafa. Hún sagði víst næstum afsakandi um leið og hún fór með feng sinn: „Ég hef fengið svo mikinn áhuga á íslenskum bókmenntum.“.“