Egg Tryggva og Tryggvínu eru ekki í hættu vegna snjókomunnar í gær og í dag en annað er uppi á tengingnum ef snjóar á ungana.
Snjórinn sem kyngdi niður á höfuðborgarsvæðinu í gær og í nótt kom mörgum á óvart, þrátt fyrir að staðreyndin sé sú að snjókoma í apríl sé ekkert sérlega sjaldséð, enda búum við á eyju úti á ballarhafi og það nálægt norðurskautinu. En hvað um það, tjaldarnir Tryggvi og Tryggvína eru komin með egg í óðal sitt á þaki Ísólar í Ármúlanum. En ætli snjórinn hafi áhrif á eggin?
Ekki segir líffræðingurinn Sölvi Rúnar Vignisson, sem sérhæfir sig í fuglum. „Nei, það ætti ekki að hafa áhrif, þau ættu að geta haldið á þeim hita,“ sagði hann en bætti við: „En ef að það kemur hret á ungatímabilinu, þá drepst allt.“
Nú er bara að krossleggja fingur og vona að veðurguðirnir séu búnir að fá nóg af snjókomunni.