Drápa forlag bauð til hálfgerðrar hrekkjavökuveislu í gær til að fagna útgáfu bókarinnar Hin ódauðu eftir Johan Egerkrans.
Veislan, sem fór fram á Gráa kettinum, hæfði tilefninu og mættu vinir og velunnarar Drápu og skemmtu sér.
Í útgáfuteitinu fékk Ingunn Snædal, þýðandi bókarinnar, Þýðingarverðlaun Drápu 2019 fyrir þýðinguna á bókinni.
„Ingunn er mikilvirkur þýðandi sem hefur vakið athygli fyrir fjölbreyttar þýðingar ólíkra bókmenntagerða undanfarin ár. Ingunn á þennan heiður svo sannarlega skilið,“ segir Ásmundur Helgason einn eigenda Drápu og Gráa kattarins.
Drápa forlag hefur gefið út bókina Hin ódauðu, eftir hinn sænska Johan Egerkrans. Í bókinni sýnir Johan lesendum einstakt yfirlit yfir vampírur og afturgöngur frá öllum heimsálfum. Johan skrifar textann og teiknar einstakar myndir af hinum ódauðu, þannig að um síður bókarinnar líða hinar mestu furðuskepnur sem hafa lifað í munnmælum þjóða um allan heim. Þannig fá lesendur að kynnast golem, smámennum, helgleypi og hinu furðulega veltihöfði, svo fátt eitt sé talið.
Mikilvægur kafli í bókinni snýr að vörnum gegn hinum ódauðu en ekki síður mikilvægt er að læra að þekkja hin ódauðu frá hinum lifandi.
Bókin var tilnefnd til sem besta bók almenns efnis fyrir ungmenni í Svíþjóð 2018 og nú fá Íslendingar að kynnast þessari einstaklega fallegu, en jafnframt hræðilegu bók Johans Egerkrans.
