2019 | Birtingur útgáfufélag ehf | k.t. 620867-0129 | VSK.nr 11788 | Síðumúla 28 | Allur réttur áskilinn. Notkun á efni miðilsins er óheimil án samþykkis.

Einmitt rétti tíminn til að gefa út bók

Bókin Heillaspor – gildin okkar kom nýlega út og fjallar um gildin sem leggja grunn að farsælu lífi fyrir ungt fólk og fjölskyldur þess. Höfundar bókarinnar eru þau Gunnar Hersveinn, Helga Björg Kjerúlf og Hera Guðmundsdóttir

Bókin er skrifuð fyrir börn og hvetur fjölskyldur, foreldra og börn til að ræða saman um mikilvæg lífsgildi eins og vináttu, virðingu, hugrekki og þakklæti og fyrirgefningu svo nokkur dæmi séu tekin.

Helga Björg Kjerúlf, hönnuður og einn höfundur bókarinnar, segir boðskap bókarinnar koma sér vel í því óvenjulega ástandi sem ríkir núna vegna útbreiðslu kórónaveirunnar.

„…fólk vill meira gæðaefni fyrir börnin sín núna.“

„Við vorum einmitt að velta útgáfu bókarinnar fyrir okkur og héldum að þetta væri kannski ekki rétti tíminn til að gefa út bók. En eftir því sem við hugsuðum meira um þetta þá sáum við að þetta er einmitt rétti tíminn. Okkur þótti alveg svolítið leiðinlegt að geta ekki haldið útgáfuhóf en auðvitað er það ekkert stórmál. Það sem skiptir mestu máli er að bera út boðskapinn. Við sjáum það líka að fólk vill meira gæðaefni fyrir börnin sín núna,“ útskýrir Helga.

AUGLÝSING


Fallegar teikningar spila stórt hlutverk

Spurð út í hvernig bókin varð til segir Helga: „Gunnar Hersveinn gaf út bókina Gæfuspor árið 2010. Kær vinkona gaf mér þá bók og ég las hana alveg í þaula. Ég var svo farin að lesa hana fyrir dóttur mína sem var þá níu ára en textinn var aðeins of háfleygur fyrir hana þannig að ég reyndi að einfalda hann aðeins. Ég var svo að vinna á hönnunastofu á þessum tíma og hitti þá Gunnar í gegnum vinnuna. Ég sagði honum að ég væri að lesa Gæfuspor fyrir dóttur mína stakk upp á að hann myndi skrifa bók um sama efni nema sérstaklega fyrir börn.”

Skemmst er frá því að segja að Gunnar ákvað að láta slag standa eftir smá umhugsun með því skilyrði að Helga myndi aðstoða hann við verkið. „Við fengum svo Heru Guðmundsdóttur, hönnuð og teiknara, með okkur í verkefnið,“ segir Helga.

Hugtök á borð við vinátta, hugrekki, samlíðun, fyrirgefning, virðing og náttúruást koma við sögu í bókinni.

Fallegar teikningar spila stórt hlutverk í bókinni. Helga segir textann og myndefnið hafa verið unnið samhliða hvoru öðru. Myndirnar eru einfaldar og höfða til breiðs hóps.

Hún segir skilaboð bókarinnar geta nýst fólki á öllum aldri vel, sérstaklega í því ástandi sem ríkir núna. „Við getum ekki ferðast, farið á tónleika, í leikhús eða gert annað sem við erum vön að gera en þá er gott að geta séð gleðina í lífinu sjálfu og vera þakklátur fyrir það sem maður hefur.”

Lestu meira

Annað áhugavert efni

Nýjast á Mannlíf.is