Lokastikla níunda kafla Star Wars, The Rise of Skywalker, er komin.
Myndin gerist einu ári eftir atburði síðustu myndar, Star Wars: The Last Jedi, sem sýnd var 2017. Sú mynd hlaut blendin viðbrögð bæði gagnrýnenda og aðdáenda, en eigi að síður er lokakaflans beðið með mikilli eftirvæntingu, en eins og flestir vita þá var fyrsta myndin frumsýnd 1977.
Hetjurnar Rey, Finn og Poe snúa aftur og bíður þeirra lokauppgjör baráttunnar gegn Fyrstu reglunni. Nýjar hindranir, draugar fortíðar og rísandi myrkraöfl sem leggja framtíð vetrarbrautarinnar í hættu koma við sögu, auk nýrra og eldri bandamanna.
Fjölmörg kunnugleg andlit koma aftur við sögu eins og sjá má í stiklunni, Billy Dee Williams, sem Lando Calrissian, og Ian McDiarmid, sem Palpatine keisari. Mark Hamill og Carrie Fisher, systkinin Luke og Leia, snúa aftur, en sem kunnugt er lést Fisher í desember 2016. Aðdáendur hafa velt fyrir sér hvernig framleiðendur myndu leysa hlutverk hennar, en notast verður við ónotað myndefni frá The Force Awakens og The Last Jedi, sjöundu og áttundu myndum myndabálksins.
Star Wars – Episode 9: The Rise of Skywalker verður frumsýnd þann 18. desember um allan heim.