Brynjar Níelsson, fráfarandi alþingismaður Sjálfstæðisflokksins, er einn mesti strigakjaftur sem setið hefur á þingi. Í því felst að hann er í senn kjaftfor og skemmtilegur á köflum. Margir eru þegar teknir að sakna hans þótt formlega sé hann ekki farinn eftir að hafa orðið úti í ringulreiðinni með jöfnunarsætin og kyrrstöðutap Sjálfstæðisflokksins. Sjálfur er hann sex mánuðum frá því að verða atvinnulaus. Brynjar hét því í lok september að hverfa af Facebook en gat ekki þagnað. Hann braut loforðið í gær og birti stutta færslu og mærði Viðskiptablaðið. „Mér gengur best að fara á fætur á fimmtudagsmorgnum því þá bíður mín Viðskiptablaðið í prentaðri útgáfu. Þar er að finna umfjöllun og fréttir um stjórnmál og atvinnulífið. Þar eru blaðamenn sem geta skrifað skiljanlegan texta á góðri íslensku,“ skrifar hann. Ritstjórn hins mærða blaðs svarar stutt og laggott í athugasemdakerfinu: „Atvinnuumsókn þín hefur verið mótttekin“….