Það útspil Bjarna Benediktssonar að segja af sér sem fjármálaráðherra kemur flestum í opna skjöldu. Afsögn sína skýrir hann sem afleiðingu af því áliti umboðsmanns Alþingis sem honum barst fyrir nokkrum dögum að hann hafi verið vanhæfur við sölu á bréfum í Íslandsbanka þar sem faðir hans makaði krókinn. En málið kann að vera flóknara en svo. Eins og fjallað hefur verið um í Orðrómi í maí síðastliðnum þá er hann sagður hafa gælt við þá hugmynd að hætta sem formaður í haust og hleypa Þórdísi Kolbrúnu Reykfjörð Gylfadóttur varaformanni að án þess að kosning fari fram og Guðlaugur Þór Þórðarson gæti náð formannsstólnum.
Kenningar eru uppi um að Bjarni hafi stokkið á tækifærið og notað álit umboðsmanns sem átyllu til að fara í skugga þess að flokkurinn er í fylgishruni og Samfylking trónir yfir honum sem risastór skuggi. Leikfléttan er sögð vera sú að Þórdís verði formaður og fjármálaráðherra en hann fari sjálfur í utanríkismálin og fylgi þannig fordæmi nokkurra forvera sinna um útgönguleið. Þetta mun allt skýrast á næstunni og einnig það hvernig Bjarni hyggst lenda sínum málum …