Páll Vilhjálmsson, sögukennari Fjölbrautarskólans í Garðabæ og bloggari Morgunblaðsins, mun þurfa að mæta fyrir dóm vegna meiðyrða í garð Þórðar Snæs Júlíussonar, ritstjóra Kjarnans, og rangfærslur eða með öðrum orðum sögufölsun.
Páll bloggar í skjóli Morgunblaðsins og hefur margsinnis haldið því fram að Þórður og fleiri blaðamenn tengdir Ríkisútvarpinu og Stundinni hafi átt aðild að því að byrla Páli Steingrímssyni, skipstjóra Samherja, ólyfjan og ræna síma hans. Athyglisvert er að hvorki Páll né uppljóstrarar málins hafa upplýst hver það var úr innsta hring skipstjórans sem bruggaði skipstjóranum þá ólyfjan sem svæfði hann og rændi síma hans.
Uppljóstranir um undirróðursdeild Samherja, svokallaða skæruliða, komu úr símanum og vörpuðu ljósi á ógeðfelld vinnubrögð starfsmanna sjávarútvegsrisans sem unnu leynilega að því að berja með óhefðbundnum hætti á meintum óvildarmönnum Samherja.
Sögukennarinn gefur til kynna að Samherjamenn séu saklausir í þeim málum sem snúa að mútum í Namibíu. Sú framsetning þykir afar djörf í ljósi í ljósi þess sem fram er komið og þá ekki síst í ljósi þess að forsvarsmenn Samherja hafa beðist afsökunar á framgöngu sinni.
Páll er afar umdeildur í starfi sínu sem kennari. Jafnt kennarar sem nemendur hafa lagt að Kristni Þorsteinssyni skólameistara að reka Pál en án árangurs. Kristinn hefur fram undir þetta verið sannkallaður bakhjarl Páls og leyft honum að uppfræða æskuna í Garðabæ með sínu umdeilda lagi. Óánægja vegna skólameistarans og bloggarans grasserar innan skólans sem aldrei fyrr …