Vinur Rolling Stones

Athafnamaðurinn Jón Ólafsson, sem stofnaði vatnsfyrirtækið Icelandic Glacial, túrar um þessar mundir með hinni goðsagnarkenndu rokkhljómsveit Rolling Stones. Á dögunum birtist mynd af honum í einkaþotu hljómsveitarinnar. Viðskiptablaðið sagði í sumar frá endurnýjuðu samstarfi Icelandic Glacial og Rolling Stones sem gengur út á að lágmarka kolefnisspor af yfirstandandi tónleikaferðalagi sveitarinnar í Bandaríkjunum. Er yfirskrift ferðalagsins „No Filter“. Einhverjir hafa alið með sér þá von að Jóni takist að fá þá félaga til Íslands, en það gæti verið snúið vegna kostnaðarins því kvöldið hjá hljómsveitinni kostar sjö milljónir dollara eða tæpan milljarð íslenskra króna. Það gæti því orðið bið á því að Mick Jagger og félagar komi til Íslands …