Miðvikudagur 7. desember, 2022
-0.2 C
Reykjavik

Bréf til Katrínar Jakobsdóttur

Helgarviðtalið

- Auglýsing -

Orðrómur

- Auglýsing -

Hvernig manneskja ertu orðin Katrín Jakobsdóttir?

Eftir atburði síðustu nætur er komið á daginn að Íslandi er stjórnað af andstyggilegu og mannfjandsamlegu fólki. Kannski var það flestum ljóst fyrir margt löngu?

En fyrir þessu fólki ferð þú, Katrín Jakobsdóttir.

Af hverju er ég að skrifa til þín en ekki þeirra sem teiknuðu upp fasista- og lögregluríkið Ísland? Af hverju er ég ekki að skrifa bréf til Bjarna Benediktssonar formanns Sjálfstæðisflokkins eða Jóns Gunnarssonar dómsmálaráðherra og meðlims í sama flokki?

Svarið er einfalt: Bjarna og Jóni er ekki viðbjargandi í mannvonsku sinni; hinn dystópíski hugarheimur þeirra er smækkuð mynd af fasista- og nasistadraumsýn þeirra sem réðu á tímabili yfir megninu af Evrópu með hryllilegum afleiðingum fyrir mannkynið í heild sinni.

Þeim er ekki viðbjargandi.

- Auglýsing -

Er þér viðbjargandi, Katrín Jakobsdóttir?

Hvað gerðist hjá þér? Er svona eftirsóknarvert að vera við völd; að vera forsætisráðherra í ríkisstjórn þar sem mannvonskan ræður ríkjum?

Það hlýtur að vera.

- Auglýsing -

Þú varst eitt sinn sannkölluð vonarstjarna; og þú hefur náð langt. Ef einhver hefði sagt fyrir áratug eða svo að þú myndir snúa þér undan þegar saklausu og ósjálfbjarga fólki í hörmulegum aðstæðum yrði vísað úr landi af mikilli hörku og að sjálfsögðu í skjóli nætur (enda eru Bjarni og Jón ekki mikið fyrir dagsljósið) undir styrkri stjórn dómsmálaráðherra, fjármálaráðherra og Útlendingastofnunar, er ég hræddur um að einhver hefði sopið hveljur og fullyrt að slíkt myndi aldrei gerast.

Annað hefur nú komið á daginn.

Allt sem Jón dómsmálaráðherra gerir sem stjórnmálamaður gerir hann á þinni vakt; allt sem hann hefur gert síðan hann varð illu heilli ráðherra hefur hann gert á þinni vakt.

Þú ert annaðhvort algjörlega sammála honum varðandi hina hryllilegu atburði síðustu nætur og ættir þá að sýna kjark og heiðarleika og viðurkenna það, eða þá að þú ert algjörlega mótfallin þessu ofbeldi gegn fólki sem á ekkert og getur engan veginn varið sig; og þá væri nú stórmannlegt af þér að segja frá því opinberlega.

Segðu hvað þér finnst. Þú getur það og þú mátt það.

Ekki halda áfram að dansa klaufalega í kringum mál sem snerta alla Íslendinga og Ísland allt; ekki bulla bara um að svona mál séu flókin og þarfnist ítarlegri skoðunar; segðu þína skoðun og segðu hana umbúðalaust.

Ef þú vilt að ómennskan og óréttlætið nái enn hærri hæðum hér á landi þá ertu svo sannarlega að gera góða hluti; vittu til – það styttist í flóttamannabúðirnar og alla vopnuðu verðina; það styttist í að fólk sem er ekki með réttu skoðanirnar fái brátt næturheimsóknir frá lögreglu; og nú ég er ekki að tala um flóttafólk í neyð.

Fasisminn leynist víða; en það má Jón dómsmálaráðherra eiga að hann er ekkert að fara í felur með skoðanir sínar – sem er líklega það eina virðingarverða við hann.

Þú, Katrín Jakobsdóttir, ert verkstjóri ríkisstjórnarinnar – og sem verkstjóri ertu ekki með stjórn á einu né neinu; getur ekki einu sinni tjáð hug þinn af ótta við að missa spón úr aski þínum.

Það hefur orðið á þér slæḿ persónuleikabreyting, Katrín Jakobsdóttir.

En verst er þó að vita ei hverju er um að kenna.

Eða hvað?

Ég trúi ekki öðru en að í þér leynist enn vottur af manngæsku, samúð, skilningi og umburðarlyndi. En mér hefur reyndar skjátlast ansi oft um persónuleika fólks.

Skjátlist mér hins vegar ekki, þá spyr ég og vonast eftir hreinu og beinu svari:

Ætlarðu að láta mannorð þitt verða að engu fyrir völd í nokkur ár; ætlarðu að láta heigla og hugleysingja eins og Jón Gunnarsson og Bjarna Benediktsson stjórna lífi þínu með því að leggja blessun þína yfir myrkraverk þeirra og athuga hvort það dugi bara ekki þrælvel að stinga höfðinu í sandinn stutta stund?

Þú þarft að vera með höfuðið í sandinum ansi lengi ef þú heldur að þetta nýjasta útspil „samstarfsmanna“ þinna – ef menn skyldi kalla – muni gleymast svo glatt.

Við Íslendingar erum þekktir fyrir lélegt langtímaminni og yfirleitt dugar það ykkur stjórnmálafólki að bíða af sér versta veðrið, en ég leyfi mér að fullyrða að nú gekkst þú of langt með því að samþykkja myrkraverk vondra manna, og halda að svona geti hlutirnir haldið áfram.

Ef þú hefur einhverja sómakennd eftir í sálu þinni, Katrín Jakobsdóttir, þá leysir þú upp þessa ríkisstjórn; ferð í mannbætandi meðferð þar sem markmiðið er að vera góð manneskja sem vill hjálpa þeim sem þurfa á hjálp að halda og hafna þeim sem vilja öðru fólki illt.

Ertu ennþá fær um það, Katrín Jakobsdóttir?

 

Athugasemdir

Athugasemdir eru á ábyrgð þeirra sem þær skrá. Mannlíf áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.
 

Lestu meira

- Auglýsing -

Veistu meira um málið?

Deila

Nýtt í dag

Mest lesið í vikunni

Í fréttum er þetta helst...

- Auglýsing -