2019 | Birtingur útgáfufélag ehf | k.t. 620867-0129 | VSK.nr 11788 | Síðumúla 28 | Allur réttur áskilinn. Notkun á efni miðilsins er óheimil án samþykkis.

Miskunnsamir Samherjar

Fyrir borgarstjórnarkosningarnar sögðumst við Píratar ekki vilja vinna með Sjálfstæðisflokknum því við treystum honum ekki. Þetta fannst fulltrúum flokksins ósmekklegt og kröfðust rökstuðnings. En ég hló nú bara enda veit það hvert mannsbarn að Sjálfstæðisflokkurinn og fulltrúar hans eru frægir fyrir spillingu og sérhagsmunagæslu. Það er orðið daglegt brauð að sýnt sé fram á spillingu kjörinna fulltrúa stærsta flokks landsins án þess að það hafi neinar afleiðingar. Pælið í því hvað það er klikkuð staðreynd.

 

Hverjum datt í hug að næsta útspil Sjálfstæðisflokksins væri að tengjast félagi sem hefur stundað það að múta stjórnmálafólki fátækrar þjóðar til þess að eiga auðveldara með að arðræna hana og neita svo að borga af arðráninu skatta? Flokkurinn þekkir það vel að fela peninga í aflandsfélögum til þess að þurfa ekki að borga réttláta skatta. Ég hélt að sjálfstæðismenn létu sér duga að arðræna okkur Íslendinga. En nei, betur má ef duga skal til þess að fóðra þessa ómettandi græðgismaskínu sem þekkir engin takmörk.

Sjávarútvegsráðherra Sjálfstæðisflokksins virðist eiga að fá að sitja áfram þar sem risaspillingarmál er rannsakað og vinur ráðherrans er höfuðpaur málsins í félagi sem ráðherrann tengist beinum hætti. Eyþór Arnalds, oddviti borgarstjórnarflokks Sjálfstæðisflokksins, hefur verið margsaga. Hann hefur hvorki komið heiðarlega fram né lagt spilin á borðið og þó hefur hann fengið fjölmörg tækifæri til þess. Svo mikið er honum í mun að svara ekki eðlilegum spurningum að hann rauk af borgarstjórnarfundi þegar ég vakti máls á Samherjamálinu í ræðu minni og sást svo ekki meir á fundinum. Oddviti Sjálfstæðisflokksins í stærsta sveitarfélagi landsins virðist eiga að fá að komast upp með að fá að gjöf hundruðir milljóna frá félagi sem allt bendir til að hafi mútað stjórnmálafólki án þess að hann þurfi að svara fyrir það. Þá hlýtur bara allt að vera leyfilegt í Sjálfstæðisflokknum. Svo gera sjálfstæðismenn lítið úr okkur pírötum fyrir að ljá máls á þeirri einföldu staðreynd fyrir kosningar að þeim sé ekki treystandi.

Klassísk varnarviðbrögð Sjálfstæðisflokksins er að gera lítið úr gagnrýni og sýna af sér hneykslun og móðgunargirni. Markmiðið er að almenningur venjist spillingu sem ósköp eðlilegum hluta af stjórnmálunum. Það nýjasta í vopnabúri Sjálfstæðisflokksins sem fer að verða kunnuglegt stef er að segja þá sem benda á spillingu og ósiðlegt athæfi hafa brotið siðareglur. Eyþór Arnalds lýsti því yfir að mig skyldi draga fyrir forsætisnefnd því ég hafi brotið siðareglur með því að benda á staðreyndir. En siðareglur eru ekki, eins og Sjálfstæðisflokkurinn virðist halda, samkomulag stjórnmálastéttar um samtryggingu sem hægt er að nota til að þagga niður í gagnrýni og eðlilegum spurningum.

AUGLÝSING


Sjálfstæðisflokkurinn er flokkur sérhagsmuna, spillingar og yfirgengilegrar græðgi. Fulltrúarnir svífast einskis. Við lofuðum að vinna ekki með Sjálfstæðisflokknum fyrir kosningar og höfum aldrei séð eftir þeirri ákvörðun. Allra síst undanfarna daga.

Eftir / Dóru Björt Guðjónsdóttur

Höfundur er oddviti Pírata í borgarstjórn og formaður mannréttinda-, nýsköpunar- og lýðræðisráðs Reykjavíkur.

Ekki missa af þessum

Annað áhugavert efni