2019 | Birtingur útgáfufélag ehf | k.t. 620867-0129 | VSK.nr 11788 | Síðumúla 28 | Allur réttur áskilinn. Notkun á efni miðilsins er óheimil án samþykkis.

    Andrea Bocelli með risatónleika í Kórnum

    Andrea Bocelli heldur risatónleika í Kórnum laugardaginn 23. maí, ásamt sinfóníuhljómsveit, kór og sérstökum gestum.

     
     
    Ítalski söngvarinn og einn ástsælasti tenór heims, Andrea Bocelli, heldur sögulega risatónleika í Kórnum laugardaginn 23. maí. 2020. Bocelli er þekktur fyrir að vera með eina fallegustu rödd heims og hefur selt yfir 90 milljón plötur á heimsvísu. Hann átti þátt í því að færa sígilda tónlist í samtímann þar sem lögin hans hafa náð fyrsta sæti á öllum helstu topplistum heims. Celine Dion telur að ef guð hefði söngrödd, þá myndi hún hljóma eins og röddin hans Bocelli.
     
    Kórnum í Kópavogi verður í fyrsta sinn umbreytt í sitjandi sal, en einungis verður boðið upp á númeruð sæti og lögð áhersla á að salurinn verði hlýr og notalegur. Hljóð, skjáir og svið verða á heimsmælikvarða og ásamt Bocelli kemur fram 70 manna sinfóníhljómsveit SinfoNord, kór frá Söngsveitinni Fílharmóníu og sérstakir gestir. Hér er því hægt að lofa einstakri og ógleymanlegri upplifun. Tæplega átta þúsund sæti verða í boði á sex verðsvæðum og miðarnir kosta frá 12.990 kr., sem þýðir að hér er um að ræða stærstu sitjandi tónleika fyrr og síðar á Íslandi, en samanborið við tónleika hans erlendis er um talsvert meiri nánd að ræða en víðast hvar annars staðar.
     
    Andrea Bocelli gaf út plötuna Si Forever: The Diamond Edition 8. nóvember 2019 og er um að ræða stækkaða útgáfu af efni plötunnar Si sem toppaði vinsældarlista. Platan inniheldur dúett með Ellie Goulding og glænýtt lag með Jennifer Garner. Í kjölfarið fór hann í tónleikaferðalag um Bretland og Bandaríkin og spilaði meðal annars tvenna tónleika í Madison Square Garden. Á dögunum var platan tilnefnd til Grammy verðlauna fyrir árið 2019.
     
    Tónleikarnir verða í tveim hlutum; fyrri hluti er sígildari og þar tekur hann þekktustu óperuaríurnar, en í seinni hluta tekur hann alla sína vinsælustu slagara.
    Miðasala hefst föstudaginn 13. desember kl. 10 á Tix.is/bocelli.
    Forsala fer fram daginn áður kl. 10 og hægt er að skrá sig í hana hér.

    Bocelli fæddist 1958 á bóndabæ foreldra sinna í smábænum Lajatico, innan um vínekrurnar í Pisa héraði á Ítalíu. Hann sýndi tónlist mikinn áhuga frá unga aldri, byrjaði að spila á píanó sex ára og svo seinna á flautu, saxafón og fleiri hljóðfæri. Að lokum fann hann röddina sína, sitt besta hljóðfæri. Hann hélt áfram að syngja meðfram námi í  Pisa og kláraði gráðu í lögfræði.

    Árið 1994 kom Bocelli fyrst fram í óperu en þá var það Macbeth eftir Verdi og áður en árinu lauk var honum boðið að syngja fyrir páfann. Árið 1996 gaf hann út lagið Con te Partirò (og seinna meir kom lagið út í annari útgáfu ásamt Söruh Brightman undir nafninu Time to Say Goodbye) og mátti heyra lagið mikið spilað í öllum heimshornum. Hann gaf næst út plötuna Romanza sem sló öll met. Ferillinn  fór á flug og hefur verið sleitulaus sigurganga síðan þá.

    Ferill Andrea Bocelli spannar nú einn fjórða úr öld og ber hæst 6 Grammy tilnefningar, 6 tilnefningar til Latin Grammy verðlauna, Golden Globe verðlaun og Óskarsverðlaunatilnefningu, milljónir platna seldar, heimstúrar og stjarna á Hollywood Walk of Fame. Hann hefur alltaf reynt að breiða út boðskap jákvæðni, vonar og þrautseigju. Tónlist hans hefur snert huga og hjörtu fólks djúpt um allan heim og með baráttu sinni í góðgerðarmálum, hefur hann verið röddin sem gefur heiminum rödd.

    Lestu meira

    Annað áhugavert efni

    Nýjast á Mannlíf.is

    Nýjast á Gestgjafanum