2019 | Birtingur útgáfufélag ehf | k.t. 620867-0129 | VSK.nr 11788 | Síðumúla 28 | Allur réttur áskilinn. Notkun á efni miðilsins er óheimil án samþykkis.

    Bó, Stjórnin, Mannakorn og Ný Dönsk á Hjarta Hafnarfjarðar

    Tónlistar- og bæjarhátíðin í Hjarta Hafnarfjarðar verður á sínum stað í sumar enda hátíðin lítil og krúttleg þó hún hafi verið vaxandi síðustu ár. Hátíðin fellur því vel undir samkomutakmarkanir og fjölda samkvæmt þeim.

     

    Hátíðin hefur á örfáum árum fest sig í sessi í Hafnarfirði og er orðin hluti af sumardagskrá bæði íbúa og nágranna Hafnarfjarðar sem eru búnir að átta sig á töfrum Strandgötunnar og nágrenni hennar, en þar er að finna marga skemmtilega veitingastaði og margir hfa líkt hverfinu við listamannahverfi erlendis.

    Tónleikar utandyra

    Tónleikar fara fram bæði inn í Bæjarbíói og á planinu fyrir framan húsið á Strandgötu. Þar verður tónleikum sem fram fara inn í húsinu varpað á tjald, og einnig verður þar lifandi tónlist.

    AUGLÝSING


    Tónleikar innandyra

    Fyrstu listamennirnir sem kynntir eru til leiks í ár eru ekki af verri endanum og það má segja að hér séu nokkur stærstu nöfn íslenskrar dægurtónlistar síðustu áratuga. Öll eiga þau lög á topp listum síðustu áratuga: Mannakorn, Stjórnin, Björgvin Halldórsson og Ný Dönsk, það má því vera lýð ljóst að hér verður hver gæðum hlaðin tónlistarstundin á eftir annarri.

    Mannakorn

    Þriðjudagskvöldið 14. júlí: Mannakorn 
    Í 40 ár hefur hljómsveitin Mannakorn fylgt þjóðinni með hverri dægurperlunni á fætur annarri. Lög sem eru orðin þjóðareign og söngluð eru á mannamótum um allar sveitir allt árið um kring. Þar nægir að nefna lög eins og Reyndu aftur, Einhverstaðar einhvern tímann aftur, Elska þig, Braggablús, Gamli góði vinur, Ég elska þig enn, Óralangt í burtu, Á rauðu ljósi, Sölvi Helgason, Samferða, Garún og Ó þú?  Þau Maggi Eiríks, Pálmi Gunnars og Ellen Kristjáns verða ásamt hljómsveit á sviðinu.

    Stjórnin

    Miðvikudagskvöldið 15. júlí: Stjórnin 
    Hljómsveitin Stjórnin, þau Sigga Beinteins og Grétar Örvars, virðast aldrei hafa verið vinsælli en síðasta ár. Það er sama hvar sveitin stígur á stokk þessa daganna, þá ætlar allt um koll að keyra. Á tónleikum þeirra í Bæjarbíói í fyrra var stuðið svo mikið að tónleikahaldari velti því fyrir sér af hverju hann var að selja í sæti, því enginn sat í þeim alla tónleikana.

    Björgvin Halldórsson

    Fimmtudagskvöldið 16. júlí: Björgvin Halldórsson og hljómsveit 
    Okkar eini sanni Björgvin Halldórsson verður að sjálfsögðu með og það er hreinlega óhugsandi að njóta ekki krafta og hæfileika Björgvins okkar í hans heimabæ! Hann hefur verið órjúfanlegur hluti af hátíðinni frá upphafi og er eini listamaðurinn sem hefur staðið á sviði Bæjarbíós öll árin. Björgvin kemur fram á hátíðinni í fjórða skipti ásamt hljómsveit.

    Ný Dönsk

    Föstudagskvöldið 17 júlí: Ný Dönsk  
    Á föstudagskvöldið verður það svo Ný Dönsk sem stillir sér upp á sviðinu í Bæjarbíó. Framlag þeirra til dægurmenningar Íslands er ótvírætt, lagalistinn er langur og fjölbreyttur og þá skemmir ekki að í hljómsveitinni eru bæði fanta lagasmiðir og afburða hljóðfæraleikarar. Hljómsveitin hefur ítrekað fyllt Bæjarbíó og oftar en ekki kvöld eftir kvöld. Það má því ljóst vera að miðarnir á þessa tónleika stoppa ekki lengi í sölu. Hljómsveitina skipa sem fyrr; Björn Jörundur Friðbjörnsson, Daníel Ágúst Haraldsson, Jón Ólafsson, Ólafur Hólm, Stefán Hjörleifsson og þeim til aðstoðar er Ingi Skúlason, bassaleikari.

    Miðasala er hafin á þessa viðburði og fer hún fram á tix.is

    Lestu meira

    Annað áhugavert efni

    Nýjast á Mannlíf.is

    Nýjast á Gestgjafanum